إيه اللي بيحصل دلوقتي في ملف التنقيب عن الغاز الطبيعي وايه المفاجآت الجديدة في السوق المصري.. والايام الجاية هنشوف فيها ايه.
ملف الغاز في مصر من الملفات اللي كان ليها تأثير كبير على الأوضاع الاقتصادية والمعيشة في الشهور الأخيرة ودا بعد الأزمات الكتيرة اللي أثرت على إنتاج الغاز الطبيعي زي انخفاض الإنتاج في حقل ظهر وتأخر مستحقات الشركات العالمية اللي بتنقب في مصر وارتفاع الحرارة الكبير في صيف 2024 وزيادة استهلاك العاز بشكل غير مسبوق ودا تزامن مع أزمة في موارد الدولار ورغم كده قدرت الدولة تستورد بحوالي 5 مليار دولار غاز في السنة اللي فاتت بعد ما كنا نصدره.
بعد نهاية الصيف اللي فات بدأت انفراجة كبيرة في ملف الغاز ودا بعد اعتماد خطة حكومية عاجلة لاستعادة معدلات الإنتاج الطبيعية وكمان تحفيز عمليات التنقيب ودا بدأ بسداد جزء كبير من مستحقات ومتاخرات شركات البترول الأجنبية في مصر وبعدها بدأت الشركات ترجع تشتغل في الحقول القديمة وبعدها بدأت الدولة تطرح مناطق جديدة للتنقيب والاستكشاف في كل أنحاء مصر وقدمت كمان حوافز جديدة للشركات الأجنبية لزيادة إنتاج الغاز منها السماح بتصدير حصة معينة من الإنتاج الجديد بحيث تستخدم عائداتها في سداد باقي المستحقات المطلوبة بالإضافة لرفع سعر حصة الشركات الأجنبية من الإنتاج الجديد من الغاز.
طيب ايه الجديد في ملف الغاز ؟
لو فاكرين في أغسطس اللي فات الشركة المصرية القابضة للغازات الطبيعية إيجاس طرحت مزايدة كبيرة للشركات العالمية للتنقيب عن الغاز في 12 منطقة بالبحر المتوسط ودلتا النيل وتم وغلق باب التقديم في فبراير اللي فات وتم الكشف عن تقدم 3 شركات نفط عالمية بعروض في المزايدة العالمية.. والمعلومات بتقول إنالشركات المقدمة للعروض كلها شغاله في مصر بالفعل وتوقع الإعلان عن نتائج المزايدة في مايو اللي جاي بناء على نتائج فحص العروض الفنية والمالية للشركات المتقدمة.
وحسب المعلومات بردو شركات شيفرون" الأميركية وشل البريطانية، وإيني الإيطالية هي اللي قدمت عروض للاستكشاف ب4 مناطق رئيسية للبحث عن الغاز في البحر المتوسط ضمن المزايدة وإن شركة شيفرون بالذات مهتمة بالحصول على أكتر من منطقة في المزايدة.. طبعا الشركات دي دولية وهي الأشهر في العالم بمجال التنقيب وليهم مشروعات ضخمة في مصر وإيني هي اللي اكتشفت حقل ظهر .. ومشروعات التنقيب الجديدة بتقول إن ملف الغاز هيشهد نقلة نوعية مع دخول العمالقة التلاتة في التنقيب بمناطق جديدة خاصة أن المؤشرات الجيولوجية بتقول انها مناطق واعدة بالغاز.
طبعا عمليات التنقيب الجديدة معناها ضخ استثمارات جديدة وكبيرة من الدولار في السوق المصري وأن النتائج لو كانت كويسة زي ماهو متوقع يبقي مصر هترجع تاني قوة مهمة في ملف الغاز بالمنطقة ودا غير توفير مليارات الدولارات اللي بستورد بيها شحنات الغاز لتلبية الاحتياجات اليومية وكمان ممكن مصر ترجع تصدر تاني.
وبالارقام احتياجات مصر اليومية من الغاز الطبيعي بتوصل لاكتر من 6 مليار قدم مكعب مقابل إنتاج يومي 4.3 مليار قدم مكعب وبتستهدف الحكومة زيادة إنتاج الغاز الطبيعي بنهاية العام الحالي لنحو 5 مليار قدم مكعب يوميا خاصة مع زيادة الاحتياجات اليومية لنحو 7 مليارات قدم مكعب يوميا بشهور الصيف.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
