خرج الفنان كريم سرور مستنكرا الاعتداء على الشاب المعتصم أمام سينما زاوية والذي رفضت إدارة المكان عرضه فيلمه، ليقوم برفع لافتة الفيلم أمام السينما والجلوس بجانبها كنوع من الاعتراض، ليقوم العاملين في زاوية بمحاولة إبعاده بطريقة غير لائقة.
كريم سرور يكشف تجربته مع سينما زاوية
وقال كريم سرور في منشور رصده موقع تحيا مصر على حسابه الرسمي بموقع التواصل الاجتماعي فيسبوك: من حوالى ١٨ سنة لما كنت لسة عيل حلو كدة وصغنن ومراهق وبنزل أركب المترو واروح وسط البلد عشان أبقى مثقف وأشرب سجاير براحتى وقهوة مانو كنت كتير بحضر عروض أفلام مستقلة فى سينما مركز الإبداع ، لرامى الجبرى بقى أو محمد حسين راشد أو رامى سامى وكنت أقابل هناك أستاذنا الكبير المحترم ناجى عبدالله .. وكنت من حين لآخر كدة يراودنى صناعة فيلم قصير مستقل ( عملته بعد كدة وخدت جوايز كمان ) لكن وقتها يعنى كنت بدور هل فيه مفهوم للسينما المستقلة زى مفهوم ال B Movies اللى فى أمريكا وإن فيه دور عرض بعينها بتعرض فقط الأفلام المستقلة اللى بره أستوديوهات هوليود يعنى وبدأت المبادرة دى فى مصر بعد سنين من الوقت اللى بحكى عنه ده فى قاعة فى سينما أوديون . تحت إسم سينما زاوية .
وتابع: كانت الأمل ( الوحيد ) لصناع الأفلام الهواه والمستقلين وفضلت رمز مهم جداً لكل الجيل ده واللى بعده وبعده لأنها كانت منفذ مهم جداً لمشاهدة فن مختلف عن السائد وبعدها خدوا سينما كريم ١ وبقت سينما زاوية ومكانها ثابت ومعروف وكل من يحب السيما وحلاوتها ومرارتها هتلاقوه متابع جدولها سواء بانوراما الفيلم الأوروبى أو تصفيات الأوسكار أو كان أو غيرها من مهرجانات الكوكب بالإضافة طبعاً لسينما حبايبنا اللى غاويين وهاويين وكل يوم يطلعلونا بفيلم بيحكى من القلب مش من اللوكيشن .
كريم سرور: حاسس بالإهانة للمخرج الشاب المعتصم أمام سينما زاوية
واستكمل كريم سرور حديثه: فأنا متفهم جداً جداً ليه مخرج شاب يروح لزاوية ، وحاسس بإهانة بجد ليا أنا شخصياً لما شوفت الفيديو .. كأنهم زقونى أنا شخصياً بجد . ولما تكون دى بداية السينما وفكر هذه السينما وينتهى الأمر بضرب المخرجين يبقى طبيعى أفهم إن ده الوضع العام اللى إحنا فيه وإنه تم الإستيلاء على أحلام الشباب وإحتكارها لمبرمجى مهرجانات الفساتين السواريه والأفتر بارتى .. معنديش رؤية تانية للموضوع غير دى فكمان مش عاجبكم إن الناس تقف جنبه .. وعمالين تطبلوا لبعض على جثة فيلم مستقل.
كريم سرور: بعلن مقاطعتي لسينما زاوية
واضاف كريم سرور: عموماً أنا بعلن مقاطعتى لسينما زاوية لحين ما تعرض الفيلم المنشود ودى أقل حاجة أعملها للشاب ده وغير كدة معنديش وأتمنى سينما زاوية تعيد تفكير كويس فى اللى حصل ده وأتمنى كمان يتم عمل لجنة خاصة فى جهاز السينما التابعة لوزارة الثقافة لدعم الأفلام المستقلة وخلق منافذ جديدة لعرضها وتبنيها بشكل يليق بالمواهب مش بعقلية مبرمجى المهرجانات وأهواءهم وعلاقتهم الشخصية فقط.
واختتم: وإعوا تنسوا أبداً إن محدش بدأ كبير .. وطبيعى الكبير يحتوى الصغير مش يسخر منه ويبرر تعنيفه .. جتكوا وكسة فرقتوا إيه عن الغوغاء والهمج اللى الداخلية بتقبض عليهم كل شوية.
