منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن خطة جديدة من الحكومة للتخلص من ديون صندوق النقد.
أكد التقرير، أن مصر عندها التزام مهم جدا في الوقت الحالي أنها تتخلص من الديون الخارجية خصوصا الديون الخاصة بصندوق النقد، وخلال شهر سبتمبر الحالي الدولة هتسدد جزء كبير من ديون الصندوق اللي موجودة علي مصر هتوصل قيمتها لـ397 مليون دولار، ومع نهاية 2025 مصر هتسدد 1.07 مليار دولار من الديون وفوائدها للصندوق علي مصر.
وأضاف التقرير، أن ميزانية الدولة للسنة المالية الحالية بتستهدف تحقيق فائض أولي بنسبة 4٪ من الناتج المحلي الإجمالي، وده هدف مهم للدولة علشان تقدر تسد الدين وتقلل الخطر المالي وده واحدة من الأهداف المهمة للحكومة للتخلص من الديون الخارجية، والحكومة حطت خطة مستهدفة للتخلص من ديوننا الخارجية بالكامل خصوصا ديون صندوق النقد الدولي في 2047 وبدون اي جدولة.
وأوضح تقرير بانكير، أن صندوق النقد توقع أن نسبة الدين الخارجي للناتج المحلي تنزل من 46٪ في 2025 إلى 34٪ في 2030، ده في حالة لو الحكومة فضلت ماشية في المسار الاقتصادي الحالي، ونفذت خططها لزيادة مورادها الدولارية، وكملت خطط التخارج من الشركات والقطاعات المملوكة للقطاع العام.
في الوقت الحالي في مصادر كتيرة مصر شغالة عليها لزيادة الإيرادات أولها رفع الإيرادات الضريبية، كمان برنامج الطروحات الحكومية واللي حقق حتى الآن أكثر من 6 مليار دولار في الناتج القومي المصري.
منصات بانكير قدمت تقرير مختلف النهاردة عن كهرباء مصر تغزو دول أوروبا.
قال التقرير، إن مصر تتوسع في مشروعات الطاقة المتجددة، وده لأنها عملت اتفاقيات مع عدد من دول العالم للربط معاهم بخطوط ربط كهربائي.. واحدة من الدول اللي الدولة مركزة في مشروعات الربط معاهم هيا اليونان وقبرص واللي هيكون الخطوة الأولي لمصر للتحكم في كهرباء قارة اوروبا بالكامل.
وأضاف التقرير، أن مصر واحدة من الدول اللي ربنا عطاها إمكانيات كبيرة في الطاقة المتجددة واللي مصدرها الأساسي هيا طاقتي الشمس والرياح، خصوصا في المناطق الصحراوية وعلى ساحل البحر الأحمر، وده اللي الحكومة بتشتغل عليها حاليا في مشروعات بدأت في التشغيل علي الشبكة الموحدة للكهرباء، وفي مشروعات تانية هتدخل علي شبكة الإنتاج خلال وقت قريب قوي.
وأشار التقرير إلى أن الكهرباء اللي هتنتجها محطات توليد الطاقة المتجددة هتمكن مصر من حلمها بالتحكم في كهرباء العالم كله، واللي هيكون منها خطي كهرباء قبرص، وده هيكون عبارة عن مشروع كابل بحري هيمر من البحر المتوسط بقدرات متوقعة في البداية 2000 ميجاوات وبطول هيوصل لـ1 و 396 متر.، وهيبدأ يدخل حجز التنفيذ في 2029.. أما عن الخط التاني واللي هيكون بين مصر واليونان، واللي هيكون بقدرة 3 الاف ميجاوات وهيكون بإجمالي طول 950 كيلومتر تقريبا، وهتوصل التكلفة التقديرية بتاعته لـ 4.2 مليار يورو، وهيكون الاعتماد الأكبر عن الخطوط اللي من الأنواع دي علي الكهرباء اللي بتكون انتاجها من مشاريع الطاقة المتجددة.
وحدة أبحاث بانكير قدمت تقرير خاص النهاردة عن خطة الحكومة لتوطين صناعة بطاريات أيون الليثيوم والخلايا الكهروضوئية.
أكد التقرير، أن الدكتور محمود عصمت، وزير الكهرباء والطاقة المتجددة، عمل زيارة ميدانية لهيئة المواد النووية في القطامية، وده لأن مصر داخلة بكل قوتها في خطة توطين صناعة بطاريات أيون الليثيوم والخلايا الكهروضوئية، الصناعتين دول هما قلب التحول العالمي ناحية الطاقة المتجددة والتخزين الكهربائي، يعني ببساطة، أي عربية كهربا أو أي محطة طاقة شمسية، وأي مشروع معتمد على التكنولوجيا النظيفة، لازم يكون وراه بطاريات ليثيوم قوية وخلايا شمسية بجودة عالية.
وكشف التقرير، أنه خلال الزيارة، اتعرضت على الوزير خطة عمل متكاملة للهيئة، في مجالات زي الاستخلاص والاستكشاف والاستشعار عن بُعد، وكمان سمع شرح مفصل عن مشروعات زي تعظيم الاستفادة من الملح الصخري وتصنيع الألواح الشمسية، والدخول في عالم أشباه الموصلات وصناعة الرقائق الإلكترونية.
ولأول مرة في مصر، اتقال إننا وصلنا لمرحلة إنتاج أول رقيقة من خام الكوارتز النقي، خطوة ضخمة جدًا هتفتح الباب قدامنا في تصنيع الخلايا الشمسية محليًا بدل ما نستوردها بملايين الدولارات.. الدكتور عصمت أكد أن هيئة المواد النووية مش مجرد جهة بحثية، لكنها شريك اقتصادي حقيقي في خطة الدولة، واللي هدفها الأساسي هو تعظيم العوائد من الموارد الطبيعية، ونقل التكنولوجيا، وتقليل الاستيراد، بمعنى أصح: نصنع هنا بدل ما نشتري من بره.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
