حرصت الفنانة أيتن عامر على توجيه رسالة مؤثرة لوالدها الراحل، وذلك بعدما قامت بوضع صورة لها في أحضانه بواسطة الذكاء الاصطناعي، وأشارت إلى أنها تحتاجه للتغلب على المصاعب التي توجهها في هذه الحياة.
أيتن عامر توجه رسالة مؤثرة لوالدها
وكتبت أيتن عامر على الصورة التي رصدها موقع تحيا مصر عبر حسابها الرسمي بموقع تبادل الصور والفيديوهات انستجرام: وحشتنى أوى أوى أوى وحقيقي محتاجالك ، الدنيا مش حلوة يا بابا ولا الناس كمان ، كل مرة بتحط فى اختبار صعب او ازمة مفيش حد بيجيى فى دماغى غيرك ، اول واحد بيبقى نفسي اجرى عليه و اقوله الحقنى بيبقى انت.
وتابعت أيتن عامر حديثها: جودك كان هيفرق اوى اوى ، يمكن عمرى ما قولت ان غيابك مسببلى ازمة كبيرة ولا قولت اللى جوايا ، بس هييجى يوم و ابقى قوية كفاية انى أواجه وجع قلبي و اطلع كل الكلام اللى جوايا و مقولتهوش ، زعلانة منك فى حاجات و مفتقداك فى حاجات اكتر بكتير ، و متأكدة ان لو كنت موجود كنت هتبقى السند بس غيابك خلانى أنا السند لنفسي و للى حواليا كمان ، لأن فيا منك كتير خصوصا قوتك و جدعنتك مع الكل ، بس أنا تعبت من كتر القوة و زهقت مبقتش عايزة ادخل حروب و لا عايزة مشاكل ، اللى عايز يفهم حاجة يفهمها و اللى عايزة ياخد فكرة ياخدها لا هبرر ولا هدافع ، بس اتطمن بنتك بميت راجل و مهما قابلت هتفضل واقفة و راسها فى السما هتاخد استراحة محارب و عمرها ما هتبدأ حروب بس دايما هتكون مستعدة و جاهزة لاى حاجة و ساعتها مش هيكون فى احتمالية للخسارة .
أيتن عامر لوالدها: وحشتني ومشبعتش منك
واختتمت أيتن عامر حديثها: بحبك و وحشتنى و زعلانة منك و مشبعتش منك و جوايا وجع كبير بس مش هقولك غير كلمة واحدة اتطمن بنتك قدها.. الترند صورة متصورتهاش دة منتشر اوى اليومين دول و اول ما السوشيال ميديا تيم بعتولى الصورة لقتنى بكتب كلام كتير من قلبي و جوايا اكتر من كدة مليون مرة و عندى صور كتير اوى ناقصها وجود بابا حقيقي .. اسفة لو طولت عليكوا شكلى فضفضت اوى.
أخر أعمال أيتن عامر
ومن الجدير بالذكر أن أخر أعمال أيتن عامر فيلم "عنب" الذي تدور أحداثه في إطار كوميدي، عن ليلة توديع العزوبيه لإتمام زواج أبطال الفيلم حيث تدور احداثه في اكتشاف ما حدث في تلك الليلة مما وضع أبطال العمل في مواقف كوميدية، والفيلم ينتمى لنوعية الساسبنس الكوميدي، وشارك في بطولة العمل إسلام إبراهيم، ومحمود الليثي، نور قدري، وتوني ماهر، محمود حافظ، مع عدد من ضيوف الشرف منهم، محمد رضوان، ولطفي لبيب، ومحمود حافظ، وسامي مغاوري، حسام داغر، وطاهر أبو ليلة، وإنتاج رشا الظنحاني، والفيلم قصة أمين جمال ومحمد محرز، تأليف يوسف سالم وأحمد سالم، وإخراج أحمد نور.
