يعني إيه صادرات مصر زادت 27% في 3 شهور؟ وليه ده خلى عجز الميزان التجاري يقل 6 مليار جنيه؟ وهل ده معناه إن أزمة نقص الدولار قربت تتحل ولا لسه بدري؟ خلينا نفهم القصة ببساطة.. ونعرف ليه الخبر ده مهم جدًا ليك كمواطن.. سواء مستثمر أو حتى مجرد بتحاول تدبّر مصاريفك آخر الشهر.
الحكومة أعلنت إن صادرات مصر السلعية غير النفطية ارتفعت بنسبة 27% في أول 3 شهور من 2025.. وصلت لـ 12.67 مليار دولار بدل 9.97 مليار نفس الفترة السنة اللي فاتت.. وفي نفس الوقت عجز الميزان التجاري غير النفطي نزل بنسبة 27.7%.. وده معناه إن الفرق بين اللي بنستورده واللي بنصدره قلّ بشكل كبير.. وبقى 6.3 مليار دولار بس.
وده رقم مهم جدًا.. لأنه ببساطة يعني إن إحنا ابتدينا نقرّب شوية من المعادلة الصعبة: نصدّر أكتر.. ونستورد أقل أو على الأقل بنفس المستوى.. والمفاجأة إن الواردات نفسها ما زادتش غير بنسبة 1.5%.. وصلت لـ 18.97 مليار دولار بس.. يعني أغلب التحسّن كان سببه الصادرات.. وده تطور إيجابي جدًا.
طب ده معناه إيه؟
معناه إن فيه دولارات داخلة البلد أكتر من الأول.. ومعناه إن الضغط على العملة الأجنبية ممكن يقل.. وده يخفف شوية من أزمة نقص الدولار اللي أثرت على الاستيراد والسفر والشركات والأسعار.
الفكرة إن الدولار في مصر مش بييجي بس من السياحة أو قناة السويس.. التصدير كمان مصدر مهم جدًا.. والحكومة عندها خطة توصل بالصادرات لـ 145 مليار دولار في 2030.. وده طموح كبير.. بس محتاج شغل وتنافسية وجودة..
كمان الملف ده بقى مهم أكتر بعد ما قناة السويس فقدت حوالي 7 مليار دولار من إيراداتها السنة اللي فاتت بسبب هجمات الحوثيين في البحر الأحمر.. فكان لازم ندور على بدائل.. والتصدير هو البديل المنطقي والسريع نسبيًا.
المثير كمان إن حوالي 48% من صادرات مصر راحت للدول العربية.. يعني حوالي 6 مليار دولار.. و22% راحت للاتحاد الأوروبي.. يعني حوالي 2.7 مليار دولار.. وده معناه إن السوق موجود.. والفرص موجودة.. بس محتاجين نشتغل أكتر على الجودة والتغليف والتسويق واللوجستيات.
بس خلي بالك.. رغم التحسّن ده.. لسه الطريق طويل.. لسه الصادرات بتمثل حوالي 10% بس من الناتج المحلي.. وهي نسبة من أقل النسب في العالم.. والحكومة نفسها عايزة ترفعها لـ 30% في المستقبل.. يعني باختصار.. أيوه فيه تقدم.. وفيه أرقام مبشرة.. بس لسه الأزمة ما اتحلتش بالكامل.. ولسه محتاجين نشتغل على الإنتاج والتصنيع المحلي.. وندعم المصدرين بجد مش بالكلام.
بس لو فضلنا نصدّر أكتر ونستورد بذكاء.. نقدر نخفف أزمة الدولار تدريجيًا.. ونوصل لاقتصاد متوازن.. واللي حصل في أول 3 شهور من 2025 هو خطوة في الاتجاه الصح.. بس الخطوات الجاية أهم بكتير.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
