وجهت المطربة أمينة رسالة قاسية لمتتقدي الفنانين، خاصةً بعد حضورهم عزاء المطرب أحمد عامر، حيث قال البعض عنهم بأنهم يتناولون مواد مخدرة والآخر انتقد حضورها عزاء المطرب أحمد عامر وتغافلها عن عزاء شقيقها.
المطربة أمينة ترد على منتقديها
وقالت أمينة في منشور رصده موقع تحيا مصر عبر حسابها الرسمي بموقع تبادل الصور والفيديوهات انستجرام: جمعه مباركه عليكم اخواتى وحبايبي واصحابي معلش استفزنى كومنتات لاقيتها على الفيديوهات بتاعة عزاء أحمد عامر الله يرحمه ويحسن اليه والناس معذورة برضه العناوين المكتوبه على الفيديوهات لاتمت للواقع بصلة.
وتابعت أمينة حديثها: روحت عزيت نقابة المهن الموسيقية كل ده تمام يطلع واحد وغيرو كتير مش فاهمين أى حاجة بيهبدو وخلاص خلاص موش لاقين حاجة تتهمونا بيها تتهمونا ان احنا بنشرب وبندخل المكيفات مصر أنا هتكلم عن نفسي أنا واحده من الناس اللى ماقدرش أشرب مايه ساقعه ولا دخان من اى نوع وحسبنا الله ونعم الوكيل اللى يقول ماليس فينا اللى يشرب يشرب هو حر طالما مش بيأذينى انت كده اتهمت واحد متوفى وغيرو فنانين كتير مالهمش فى اى حاجة اتقى الله.
المطربة أمينة: اللي كاتب اني موقفتش في عزاء اخويا منك لله
واستكملت المطربة أمينة: واللى كاتب انى ما وقفتش فى عزاء أخويا منك لله يا أخى الحمدلله صلتى بكل قرايبى زى الفل مابالك أخويا مش عايزة اشتمك عشان ما تستاهلش الحمدلله لا عمرى طلعت من توبى ولا عشت الدور ولا ليا مع حد خصومه وغصب عنى كتبت كده لأول مره الناس بقت مستفزه جدًا وقليلة أدب إلا من رحم ربى انتو لا تعرفونا ولا تعرفو احنا فينا إيه وبنعانى من إيه حسدتونا وعنيكم جابتنا الأرض قاعدين تحسبوهالنا لو دققتو فى الكومنتات شوفو كاتب ايه الراجل الرزل البايخ.
واختتمت المطربة أمينة حديثها: أراهن اى حد فيكو عنده موهبة كصوت آو كممثل ومايستغلهاش مش ذنبنا ان احنا فنانين بالفطرة والموهبة وانت قاعد تحسبهالنا انت ماتعرفش بندفع ايه أودام ده منكم لله بجد معظم الناس حاطه الفنانين دول فى فريم ان احنا تماثيل شمع مش بنحس ولا عندنا دم اتقو الله فينا كفايه انتو ماتعرفوش احنا فينا إيه اتقو الله.
آخر أعمال المطربة أمينة
يذكر، أن آخر أعمال المطربة أمينة طرحها لأغنية بتخونى يا وليد من كلمات مصطفى حسن وألحان محمد عبد المنعم وتوزيع محمد عباس وميكس وماستر هانى محروس وإشراف عام سامح على ومن إخراج كامبا، وتقول كلمات الأغنية: أنا وش السعد عليك ... بعد ما كنت على الحديد. وفى وجعك قايمة بدور ... الدكتور والتمريض. حبيتك حب يكفى ... الدنيا بحالها ويفيض. تيجي أنت بعد الحب ده كله ؟؟ بتخوني ياوليد !! بتخوني ياوليد. حبك لميته فى شنطه .. وفى أقرب سله ارميها. ضيعت حياتي اونطه ... بس أن شاالله الاقيها.
