عاجل|"بيسرقوا العملاء".. شكاوي من خدمة عملاء شركة فودافون مصر

اشتكي عدد من المواطنين من شركة فودافون مصر وخدمة العملاء بها والاشتراكات والباقات بالشركة.

وقالت إحدي المتضررات من شركة فودافون،"لما يحصل مشكله يوم ١  في الباقه وتتحل ويوم ٢ بس بيتم خصم من الباقه وانا قفله ونايمه واكلمكم والاقى قلة ذوق وتزعلوا انى قولتلكم انكم بتسرقوا وبطلوا الاسلوب ده واجى يوم ٣ الاقى الخط بتاعى واقف شغال بس ولا بعرف اتصل على حد ولا حد يكلمنى شغال بس داتا وتوقفه بدون علمى على اساس انك بتعاقبنى وبكلمكم استفسر ازاى اشغل الخط تقولى كلام عبيط اللى هو  انشط وافعل خدمة الانترنت والاقى الخط برضو واقف".

وتابعت،" انا مش هسكت وهصعد الموضوع لانكم شركة غير امينه انا مش هسيب حقى لو الخط مشتغلش هنزل احرر فيكم محضر وحمايه المستهلك وجهاز القومى لتنظم الاتصالات علشان انتوا تبقى تحترموا العميل مش كفايه بتسرقوا ايه البجاحة دى بجد".

وتابع اخر،" اشتريت موبايل من فودافون وكان عليه عرض 50 جيجا مجاني وده اللي خلاني اشتري الموبايل مع انه كان اغلي من السوق ثم قمت بالاتصال بخدمة عملاء مبيعات الموبايلات 838 علشان اتاكد ان العرض ساري قبل اتمام عمليه الشراء وفعلا اكدوا لي ان العرض ساري وان الجيجا هتتقسم علي سنه بواقع كل شهر ٤ جيجا وفعلا يوم 30 يوليو فعلت العرض وجالي ٤ جيجا بس للاسف كانوا باعتين الرساله ان استهلاكها لمدة يوم واحد”.

وتابع،"قلت معلش يمكن علشان فعلته اخر الشهر فعادي وللاسف بعد كده مابعتوش باقي الجيجا مع محاولات كتير كلمت فيها خدمة العملا بدون اي جدوي وماحدش فيهم فاهم حاجه ولا بيدوني اي حلول يعني راحت عليا باقي الجيجا في العرض وما استفدتش غير ب ٤ جيجا لمده يوم واحد وحتي ماخدتش منهم جيجا واحده انا مش فارق معايا الجيجات اللي ضحكوا عليا فيها انا فارق معايا عدم المصداقية بجد اسوأ تعامل واسوا خدمة عملا شفتها في حياتي".