رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، لقاء هام في البنك المركزي، تراجع مفاجئ للذهب، وتطور جديد فى رأس الحكمة.
نبدأ من البنك المركزي.. حسن عبد الله محافظ البنك المركزي المصري استقبل نظيره الصيني اللي بيزور مصر حاليًا وقعدوا سوا واتكلموا عن إزاي يزودوا التعاون بين البنكين يعني كل واحد فيهم يشارك التاني بخبراته في الشغل البنكي والمجالات المالية وطبعًا الهدف الأساسي هو تقوية العلاقات الاقتصادية بين مصر والصين.. علشان يحققوا مصالح مشتركة.
ومن أهم الموضوعات اللي اتكلموا فيها كانت اتفاقية تبادل العملات يعني بدل ما كل حاجة بالدولار.. يبقى فيه تعامل بالجنيه واليوان بين البلدين وده هيريّح شوية في أزمة الدولار ويوفر سيولة في السوق.
كمان اتناقشوا في إصدار مصر لسندات اسمها الباندا في السوق الصيني ودي طريقة مصر بتستغلها علشان تجيب تمويل بأسعار كويسة واتكلموا كمان عن ربط أنظمة المدفوعات بين البلدين.. يعني التحويلات والدفع الإلكتروني تبقى أسهل وأسرع بين مصر والصين.
وتم التأكيد على أهمية إن البنوك الصينية تفتح فروع أكتر في مصر وفي المقابل برضه.. البنوك المصرية يكون ليها تواجد في الصين وده كله هيشجع الاستثمارات المشتركة ويقوّي الشغل التجاري بين البلدين.
وبعد القعدة دي.. المحافظين شهِدوا توقيع 3 مذكرات تفاهم في كذا مجال منهم واحدة بين بنك قناة السويس وشركة "تيدا" الصينية وشركة CIPS اللي بتشغّل نظام التحويلات بين البنوك في الصين والهدف منها إننا نوسع استخدام اليوان الصيني في منطقة التعاون الاقتصادي بين مصر والصين.
ونروح على سوق الذهب.. النهاردة أسعار الدهب نزلت شوية.
عيار 21 اللي هو الأكتر انتشارًا في مصر بقى بـ 4620 جنيه للجرام.
وعيار 24 الأغلى والأنضف بقى بـ 5280 جنيه للجرام.
وعيار 18 وصل لـ 3960 جنيه للجرام.
أما عيار 14 فسعره بـ 3080 جنيه للجرام.
والجنيه الدهب اللي وزنه 8 جرام من عيار 21 بقى بـ 36960 جنيه.
الأسعار دي بتختلف من محل للتاني حسب المصنعية اللي بتبدأ من حوالي 150 جنيه وممكن توصل لـ 400 جنيه على الجرام وده حسب نوع العيار والمكان والمحافظة والتاجر كمان.
نروح دلوقتي لتطور كبير في صفقة رأس الحكمة.. شركة مدن الإماراتية بتستعد تطلق المرحلة الأولى من مشروع رأس الحكمة على مساحة 8.5 مليون متر مربع الهدف من المشروع ده تحقيق مبيعات بـ 300 مليار جنيه وده واحد من أكبر مشروعات التنمية السياحية والعقارية في مصر.
الاتفاق على المشروع ده حصل في فبراير 2024 وشمل سداد 35 مليار دولار منهم 11 مليار كانت من ودائع البنك المركزي واتحولت لصالح شركة "مدن" علشان تستثمرها جوه مصر
و24 مليار دولار دخلوا كفلوس مباشرة من برّه.
المشروع ككل على مساحة 170 مليون متر مربع هيكون فيه مدينة متكاملة.. فيها مدن ترفيهية ورياضية وكمان مطار والحكومة متوقعة إن المشروع ده هيجذب حوالي 8 مليون سائح زيادة بعد ما يخلص.
قريب جدًا هيبدأوا في أول مرحلة من المشروع ومستهدفين يحققوا منها 300 مليار جنيه مبيعات قبل نهاية السنة والدولة المصرية هتاخد 35% من أرباح المشروع ومجموع الاستثمارات المتوقعة للمشروع كله توصل لـ 150 مليار دولار.
وأخيرًا نروح لخبر يهم الفلاحين وأهل الصعيد.. محمد أبو السعود رئيس البنك الزراعي المصري قابل اللواء هشام أبو النصر محافظ أسيوط واتكلموا عن إزاي يزودوا التعاون بين البنك والمحافظة علشان يطوّروا الزراعة ويدعموا المشروعات التنموية في أسيوط وده جزء من خطة الدولة لتحقيق تنمية مستدامة وتمكين الناس اللي محتاجة الدعم.
أبو السعود أكد إن البنك مركز جدًا على دعم الزراعة والمشروعات التنموية وكمان بيساعد في مجالات زي التعليم والصحة في الريف والمجتمعات الزراعية.
ووضح كمان قد إيه مهم إن الفلاحين يسجلوا الحيازات الزراعية بتاعتهم عن طريق منصة وزارة الزراعة علشان ياخدوا كارت الفلاح وده هيضمن إنهم يوصلهم الدعم ويصرفوا مستلزمات الإنتاج بسهولة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
