إزاي مصر هتتخلص من مليارات الدولارات ديون .. وايه تفاصيل الصفقة مع الكويت.. وايه تأثير دا على الدولار في الفترة الجاية.
قلنا كتير هنا في بانكير إن ملف الديون الخارجية من أصعب الملفات الاقتصادية اللي بتواجه الدولة المصرية على مدار سنين طويلة ودا بسبب التكلفة العالية في سداد الديون بفوائدها ودا كان بيستنزف مبالغ ضخمة من العملة الصعبة وخاصة الدولار ودا أحد أسباب ارتفاع الدولار في سوق الصرف لأن سداد الديون بيضغط على معروض العملة الصعبة بجانب أزمات دولية ساهمت في قفزات العملة الأمريكية في الفترة الأخيرة.
وعشان صعوبة ملف الديون الدولة عملت لجنة خاصة لإدارة الديون واللي خدت قرارات مهمة جدا زي الالتزام بتخفيض الدين العام الخارجي بشكل سنوي بين مليار ونص و2 مليار دولار وتقييد عمليات الاقتراض في أضيق الحدود وفي نفس اللجنة بدأت تفكر بره الصندوق عشان تخفف من وطأة الديون الخارجية ومن الأفكار دي مبادلة جزء من الديون وتحويل جزء آخر من الديون لاستثمارات والحقيقة التوجه دا جاب نتائج عظيمة لغاية دلوقتى.
ومصر قدرت قبل كده في الاتفاق على برنامجين لمبادلة الديون مع إيطاليا وألمانيا منذ عام 2011 ويجري التوسع في البرامج مع دول تانية.. والمقصود بمبادلة الديون هي تحويلها لتمويل برامج تنموية متفق عليها زي الموارد البشرية والبرامج البيئية .. وفي مؤتمر المناخ في مصر تم الكشف عن إعلان سياسي بين مصر والولايات المتحدة وألمانيا وتوقيع أول شريحة لمبادلة الديون من أجل العمل المناخي مع الجانب الألماني بقيمة 54 مليون يورو توجه لمحور الطاقة ضمن برنامج "نُوفّي"، وبعدها الاتقاق على شريحة جديدة مع الجانب الألماني بقيمة 50 مليون يورو، ليصل الإجمالي إلى 104 مليون يورو للشريحتين ما يعادل 116 مليون دولار.
ونيجي لبرنامج تحويل الديون الخارجية لاستثمارات أو مشروعات تكسب منها الدول صاحبة الديون وقدرت مصر تحول 5 مليار دولار من الديون الإماراتية الي استثمار ضمن مشروع رأس الحكمة.. وفي نفس الوقت اعلن المهندس خالد الفالح، وزير الاستثمار السعودي، خلال اجتماعه مع الدكتور مصطفى مدبولى عن تحويل 10 مليار دولار من الودائع السعوديه في البنك المركزي المصري..
طيب ايه الجديد في ملف ادارة الديون الخارجية ؟
لو فاكرين قلنا هنا من كام يوم وقبل زيارة الرئيس السيسي الأخيرة للكويت إن فيه مفاوضات ناجحة مع الجانب الكويتي لتحويل وديعة ب4 مليار دولار لاستثمارات ومشروعات في مصر ودا اللي أكدته معلومات رسمية في الساعات الأخيرة وحسب التفاصيل اتفقت مصر والكويت مفترض الكويت هتستثمر نص المبلغ على الأقل بنهاية العام الحالي وهيتوزع على عدة قطاعات وأصول ودا اللي أكدته مصادر مطلعه على المفاوضات الحالية واللي لما تنتهي باتفاق مصر هتتخلص من 4 مليار دولار من ديونها ودا هيخفف كتير من الضغط على الدولار وعلى الموازنة وهيخفف من أعباء الحكومة على الإنفاق وهتوجه استثمارات زيادة لقطاعات شعبية اكتر زي الصحة والتعليم بجانب زيادة إقبال المستثمرين وثقة اكتر في الاقتصاد المصري .. وفي نفس الوقت تحويل الديون الخارجية لاستثمارات هينعكس على سعر الدولار واللي مفترض بينخفض مع أي زيادة في المعروض.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
