يا ترى إيه سر استقرار أسعار الدهب في مصر اليومين دول، وإيه المتوقع يحصل في أسعاره قبل ما يخلص شهر أغسطس؟
من كام يوم واحنا شايفين سعر الدهب ثابت تقريبا في السوق المصري حتى مع التقلبات العالمية، والبيانات اللي جت من محلات الصاغة بتقول إن سعر الجرام مفيش فيه تغيير كبير، وده بعد ما كان فقد حوالي 15 جنيه الأسبوع اللي فات.
ودلوقتي عيار 24 اللى هو أنقى جرام دهب، واقف عند حوالي 5217 جنيه للشراء، وعيار 21 اللس هو الأكتر انتشار سجل حوالى 4565 جنيه أما عيار 18 فهو 3912 جنيه، وحتى عيار 14 الأرخص واقف عند 3043 جنيه، أما الجنيه الدهب ب 36.52 ألف جنيه.
وعلى المستوى العالمى بقى، أوقية الدهب بتتباع عند حوالى 3342 دولار،وده بيخلينا نبص شوية على الأخبار اللى محركة السوق بره، كمان في تصريحات طلعت من الرئيس الأمريكي دونالد ترامب بأن الدهب مش هيخضع لرسوم جمركية جديدة، وده خلا السوق العالمي ياخد نفس، فقبلها كان فيه لخبطة بسبب إشعارات جمركية بتقول إن سبايك معينة ممكن تدخل تحت تصنيفات عليها رسوم، لكن التصريح ده شال الشكوك وخلا التوقعات تميل للارتفاع.
بردو، الخبراء شايفين إن الاعفاء ده ممكن يفتح المجال لأسعار الدهب عالميا عشان توصل لمستويات تاريخية جديدة، وبعض التحليلات بتتكلم عن إمكانية وصول الأوقية ل 4000 دولار لو الظروف فضلت فى صالحه.
وفي نقطة مهمة لازم نحطها في الاعتبار، وهي ان استقرار سعر الدهب اليومين دول ممكن يكون مرتبط بسياسة التجار نفسهم، لأنهم ساعات بيحاولوا يحافظوا على السعر ثابت شوية في أوقات الركود عشان يشجعوا الناس على الشراء خاصة مع موسم الأفراح في الصيف.
وكمان، ما ننساش إن سعر الدهب في مصر مش بيتأثر بس بالسوق العالمي لكن كمان بسعر الدولار قدام الجنيه، يعنى لو الدولار اتحرك حتى لو بشكل بسيط، فده ممكن يغير معادلة الأسعار كلها في لحظة، وده السبب اللي بيخلى متابعة السوق المحلي والعالمي مع بعض حاجة ضرورية لأى حد بيتعامل في الدهب.
والخلاصة، هي ان استقرار الدهب في مصر دلوقتى مش معناه إنه هيفضل ثابت طول الشهر، ده احنا ممكن نشوف حركة قبل نهاية شهر أغسطس خاصة لو الأسعار العالمية طلعت فجأة، وقتها السوق المحلي هيتأثر فورا، يعنى اللي ناوي يشتري أو يبيع لازم يتابع الأخبار والأسعار أول بأول عشان خطوة صغيرة في السوق العالمي ممكن تعمل فرق كبير في جيبك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
