هو ليه فاتورة الكهرباء بتزيد في الصيف حتى لو ما زودناش استخدامنا؟، ليه التكييف بيخلص المرتب قبل الشهر ما يخلص؟.. طب ينفع نستحمل الحر ونوفر في الكهربا في نفس الوقت؟.. وإزاي نستخدم التلاجة من غير ما تستهلك كهربا أكتر؟.. وهل ينفع أعيش مرتاح في الحر.. وأوفر كهربا في نفس الوقت؟
في عز الحر، كلنا بنجري على التكييف والمروحة والتلاجة، بس أول الشهر بنلاقي الفاتورة بتيجي خيالية لكل واحد فينا.. بس الحل هنا أنك لازم ترشد استهلاك الكهربا على قد ما تقدر.. طيب إيه العمل؟
كل ما نستهلك كهربا زيادة، الضغط بيزيد على الشبكة وساعات بيحصل تخفيف أحمال، طيب نعمل إيه؟.. خليني أقولك على شوية حاجات بسيطة تفرق جدًا، ودي نصايح هتوفرلك الكهربا في الحر ده.
" title="إزاي ترشد استهلاك الكهرباء في عز الحر؟ طرق سحرية من غير ما تخسر فلوسك" frameborder="0">
طيب إزاي نرشد استهلاك الكهربا من غير ما نتعذب؟
أول وأهم حاجة: التكييف، لازم تشغله على 24 درجة، ودي درجة حرارة مناسبة ومريحة ومش هتسحب كهربا زي 18 ولا 20، واتأكد كمان أن التكييف بيشتغل بكفاءة.. يعني الصيانة الدورية، والفريون مش ناقص، ومفيش تسريبات.. وقبل ما تشغّله، اقفل الأوضة كويس، وابعد الشمس بستارة أو بلايند.. كل ده بيخلي التكييف يشتغل أقل ويوفر أكتر.
نقطة مهمة كمان كلنا بنقع فيها، وهي أنك لازم تفصل الفيشة عن التليفزيون مش بس من الريموت، لأن حتى وهو مقفول بيستهلك طاقة بسيطة بس مستمرة.
والأهم كمان، السخان الكهربائي، لأن بعد ما الميه تسخن لازم تفصل السخان، ومتعتمدش على الفصل الأوتوماتيك، لأنه بيخلي السخان يشتغل ويفصل طول اليوم، وافتح الميه السخنة بس وقت الحاجة، لأ كل لتر ميه بتوفره بيساوي كهربا أقل بتدفعها.
مش بس وكده، ده فيه حاجات عمرك ما كنت تتوقع أنها بتزود فاتورة الكهربا، واللي منها أنك ممكن تشتغل غسالة الملابس على شوية صغيرين، كمان لازم تفتح التلاجة عدد مرات أقل، لأن كل فتحة بتخليها تستهلك كهربا أكتر عشان ترجع تبرد
ولو فاتورة الكهربا بقت تقيلة على قلبك، خليني أقولك شوية خطوات بسيطة هتفرق معاك كتير، زي مثلا متنساش تنضف فلتر الهواء في التكييف، لأن لو الفلتر مسدود، التكييف هيستهلك كهربا أكتر.
طيب والدولة بتعمل إيه؟، وزارة الكهرباء بالتعاون مع وزارة البترول بدأت خطة ضخمة لضمان استمرار الكهربا من غير قطع، لأن مصر شغالة على ضخ كميات كبيرة من الغاز الطبيعي لمحطات الكهرباء، خصوصًا في فترات الذروة، علشان نقدر نشغل المحطات بكفاءة عالية من غير ما نخفف الأحمال، لأن الغاز الطبيعي هو الوقود الأساسي لتوليد الكهربا في مصر، ومع زيادة الإنتاج المحلي، الدولة بتحاول تأمن كميات تكفي حتى في أقصى درجات الحر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
