يا ترى هل الإصلاح الاقتصادي مجرد كلام ولا فيه خطة واضحة له، طب الحكومة عملت إيه وبتعمل إيه في الملف ده، وإيه الجديد فيه؟
كتير مايعرفوش، إن الحكومة المصرية شغالة على خطة الإصلاح الاقتصادي، واللي بتتكون من 4 ركائز أساسية عشان تطبق إصلاح اقتصادي حقيقي يقدر يقود النمو ويوفر فرص استثمار ويقوي الاقتصاد الوطني.
واللي حصل باختصار، إن المهندس حسن الخطيب وزير الاستثمار والتجارة الخارجية، كشف في لقاء مهم مع جمعية "شابتر زيرو إيجيبت" إن خطة الإصلاح الاقتصادي ماشية على أربع محاور رئيسية وهي السياسة النقدية وكمان السياسة المالية والسياسة التجارية ودور الدولة في الاقتصاد.
طيب كل ركيزة من دول معناها إيه؟
أول حاجة السياسة النقدية، يعني الحكومة والبنك المركزي بيتعاملوا مع التضخم وسعر الفايدة وسعر الصرف بشكل منظم، علشان يحافظوا على استقرار الجنيه ويجذبوا المستثمرين الأجانب.
ثاني حاجة هي السياسة المالية، وده بيشمل إدارة المصروفات والإيرادات العامة، يعني الدولة بتشتغل على ترشيد الإنفاق وزيادة دخلها من الضرائب والمشروعات الإنتاجية من غير ما تضغط على الناس.
تالت حاجة السياسة التجارية، وهي خطة لتوسيع الصادرات وتخفيف القيود على الاستيراد، علشان نخلي السوق المصري أكثر تنافسية ونزود التبادل التجاري مع العالم، أما الركيزة الرابعة فهي دور الدولة في الاقتصاد، وهنا الدولة بتحاول تخلق بيئة استثمارية تنافسية تشجع القطاع الخاص، وتقلل تدخلها في قطاعات ممكن يشتغل فيها المستثمرين بكفاءة أعلى.
طب إيه الخطوات على الأرض؟
الوزير قال إن الحكومة بتركز على تهيئة مناخ استثماري حقيقي، فيه تحول رقمي وخدمات سريعة للمستثمرين وكمان تسهيلات في التراخيص، وكل ده علشان المستثمر المحلي يثق والمستثمر الأجنبي ييجي.
ومن ناحية تانية، القطاع الخاص نفسه مهتم يشارك، فالمهندس أحمد السويدي رئيس مجلس إدارة الجمعية قال إنهم شايفين إن التعاون مع الحكومة هو المفتاح لنجاح خطة الإصلاح خاصة في ملف مهم زي توفير الأراضي الصناعية، ودي نقطة كانت مأزمة مستثمرين كتير قبل كده.
أما الجمعية نفسها"شابتر زيرو"، فهدفها الأساسي هو تدريب وتأهيل أعضاء مجالس إدارات الشركات عشان يبقوا مستعدين للتعامل مع التغيرات المناخية، ويدمجوا السياسات البيئية في استراتيجياتهم.
يعني الخلاصة، هي أن الإصلاح مش مجرد كلام ده شغل على الأرض برؤية واضحة وبتعاون بين الحكومة والقطاع الخاص عشان مصر تبقى بيئة استثمارية حقيقية ومركز جذب لرؤوس الأموال المحلية والدولية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
