يا ترى إيه اللي حصل في سوق الدهب، وليه كل شوية نسمع إنه نزل، وإيه هي توقعات الأسعار الفترة الجاية؟
اللي متابع السوق، هيلاحظ إن الدهب بقاله كام يوم في اتجاه هابط، ومش دهب بره بس، لأ ده جوه مصر كمان، وفعليا الدهب نزل حوالي 30 جنيه، يعني عيار 21 بقى ب4600 جنيه للجرام بعد ما كان ب4630، وكمان عيار 24 وصل ل5257، وال 18 بقى ب 3943، =ما الجنيه الدهب فسجل 36800 جنيه.
وكل ده حصل رغم إن سعر الأوقية عالميًا ثابت تقريبا عند 3337 دولار، طب إيه اللي خلا الأسعار تنزل كده؟
ببساطة، في 3 أسباب رئيسية بيأثروا على سعر الدهب، وهو سعر الدولار المحلي، وكمان سعر الأوقية عالميا، وتالت حاجة العرض والطلب جوه السوق.
وفي الحالة دي، اللي خلا الأسعار تنزل هو انخفاض سعر الدولار في مصر، وكمان الدولار نزل شوية قدام الجنيه وده خلىذا سعر الجرام ينزل، حتى لو الأوقية بره ما اتحركتش.
كمان فيه عوامل عالمية لعبت دورها، زي مثلا أمريكا وأوروبا اللي وقعوا اتفاق تجاري خفف التوتر في السوق،
يعني مفيش حرب تجارية وشيكة وده خلا الناس تقلل اعتمادها على الدهب كملاذ آمن.
كمان، في اتفاق بين أمريكا واليابان ومفاوضات إيجابية مع الصين، وده زود شهية المخاطرة عند المستثمرين، فبدأوا يروحوا للأسهم بدل الدهب، وفي كمان نقطة مهمة وهي ان المستثمرين مستنيين قرار البنك الفيدرالي الأمريكي، هل هيثبتوا الفايدة عند 4.25%-4.5%، ولا ممكن يخفضوها في سبتمبر؟
بصراحة، لو خفضوا، ممكن ساعتها نلاقي الدهب يطير تاني، بس خلينا نقول الحقيقة وهي إن السوق حاليا في حالة هدوء نسبي، بعد ما الدهب كان مولع في أبريل بسبب التوترات السياسية والاقتصادية، ودلوقتي الدنيا أهدى خاصة بعد ما الطلب قل في دول زي الهند، وفي الصين كمان استهلاك الدهب نزل 3.5%، وطلب المجوهرات نزل 26%، رغم إن الطلب الاستثماري زاد 24%، بس برضو السوق اتأثر.
أما البنوك المركزية، فبردو لسه بتشتري دهب عشان تقلل اعتمادها على الدولار، لكن الكميات اللي اشترتها في 2025 أقل من السنة اللي فاتت.
والخلاصة، هي إن لو الدنيا فضلت هادية والدولار استقر ومفيش مشاكل جيوسياسية، فممكن نشوف الدهب ينزل كمان ويوصل حوالي 2800 دولار للأوقية، لكن لو حصل تباطؤ اقتصادي عالمي أو أزمة جديدة، ساعتها ممكن يطير ويوصل 4000، بعني لو بتفكر تشتري أو تبيع دهب، تابع الأخبار كويس، لأن السوق بيتحرك بسرعة وكل خبر بيقلب الموازين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
