يا ترى ليه الفضة بتعلى بالشكل ده، وهل ممكن تكون هي الملاذ الآمن الجديد بعد ما الدهب بدأ يهدى، ولو معاك شوية فلوس تشتري فضة ولا تستنى؟
في الحقيقة، الفضة الأيام دي عاملة شغل جامد عندنا في مصر، والجرام عيار 800 بدأ الأسبوع عند 52 جنيه وطلع ل54 وقفل عند 53، أما عيار 925 فسجل حوالي 61 جنيه، وعيار 999 قرب من 66 جنيه، والجنيه عيار 925 بقى ب488 جنيه.
وبالنسبة للمشهد العالمي، فالفضة كانت طايرة، وبدأت الأسبوع عند 38.11 دولار، ووصلت ل39.91 دولار، وده أعلى مستوى من سنة 2011، بس بعدين نزلت شوية ل38 دولار، والسبب هو إعلان أمريكا عن قرب الوصول لاتفاق تجاري مع الاتحاد الأوروبي، وده خفف التوتر فالناس بدأت تهدى وتبيع شوية.
طب إيه اللي خلا الفضة تعلى الفترة دي؟
أول حاجة هي إن في ناس بدأت تدور على بديل للدهب، خاصة بعد ما أسعاره بقت نار، وفي موسم الثانوية العامة، كتير من الأسر قرروا يشتروا فضة كهدية، وده زود الطلب عليها بشكل كبير.
كمان، في حركات على مستوى التجارة العالمية، فدول زي كندا والمكسيك والاتحاد الأوروبي بيحاولوا يوقعوا اتفاقيات تجارية تقلل من تأثير الرسوم الجمركية، وده مهم لإن الفضة مرتبطة جدا بالصناعة والإنتاج.
أما بالسنة للدولار، فهو خسر حوالي 11% من قيمته من بداية السنة، ولو نزل المؤشر بتاعه ل 92 نقطة زي أيام ترامب، ساعتها الفضة ممكن توصل ل50 دولار للأوقية، والدهب ممكن يقرب من 4000 دولار.
طب يعني الفضة أغلى من الدهب؟
لأ طبعا، بالعكس دلوقتي نسبة الدهب للفضة نزلت ل86 بعد ما كانت فوق ال100 في أبريل، ومتوسطها الطبيعي بيكون ما بين 50 و60، يعني الفضة لسه مقيمة بأقل من قيمتها، ولو رجعت النسبة لمعدلاتها الطبيعية، ممكن نشوف الفضة ب63 دولار أو أكتر، يعني زيادة 60% عن دلوقتي.
طب ليه الفضة ماشية جامد كده؟
في عوامل كتير بتقف ورا ده، زي توقعات تثبيت الفايدة في أمريكا، وكمان الخوف من تباطؤ الاقتصاد العالمي، وكمان الطلب الصناعي العالي على الفضة خاصة في مجالات الطاقة الشمسية والتكنولوجيا، فوق كل ده اضطرابات سلاسل الإمداد اللي بتأثر على المعروض
ونقدر نقول، إن الفضة بقت ملاذ آمن وبقوة، لانها كانت دايما ملاذ وقت الأزمات زيها زي الدهب، بس الفرق إنها أرخص وأسهل للمستثمرين الصغيرين، يعني لو انت لسه بتبدأ، أو مش حابب تجمّد مبلغ كبير، الفضة اختيار ذكي.
والخلاصة، هب إن الفضة بترجع للساحة بقوة، ومع تقلبات الاقتصاد وانخفاض الدولار وزيادة الطلب فممكن تبقى واحدة من أقوى الفرص الاستثمارية الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
