يا ترى ليه مهم إن مصر تصنع عربية بالكامل بإيدها؟.. وهل فعلا نقدر ننافس في سوق العربيات؟.. وهل صناعة عربية محلية هتفيد المواطن العادي بإيه؟.. وهل العربيات دي هتبقى أرخص من المستورد؟.. ويا ترى هنستغنى عن الاستيراد تماما؟
لو حد قالك من كام سنة إن مصر ممكن ترجع تصنع عربيات بإيديها، كنت هتصدّقه؟.. النهاردة نقدر نقولها بكل ثقة: شركة النصر للسيارات رجعت للحياة من تاني.
وزارة قطاع الأعمال العام شغالة على خطة كبيرة لتطوير الشركات التابعة ليها، علشان تعمق التصنيع المحلي وتقلل الاستيراد، ومن أهم الشركات دي هي شركة النصر للسيارات، اللي ليها تاريخ كبير ورجعت تاخد مكانها الطبيعي في الصناعة الوطنية.
الدولة خلال السنين اللي فاتت ما كانتش ساكتة، عقدت اتفاقيات مع شركات عالمية كبيرة علشان تنقل الخبرة والتكنولوجيا، وتمد النصر بكل اللي محتاجاه علشان تبدأ إنتاج عربيات كهربائية بالكامل، وده جزء من خطة الدولة علشان تخلّي مصر مركز حقيقي لصناعة المستقبل.
" title="طرح أول سيارة كهربائية من إنتاج شركة النصر المصرية.. سعرها مفاجأة" frameborder="0">
وزير قطاع الأعمال، المهندس محمد شيمي، أعلنها بوضوح، وقال: شركة النصر للسيارات جاهزة تطرح أول عربية كهربا مصرية في السوق قبل نهاية السنة دي.
بس زي أي مشروع ضخم، فيه تحديات، من أهمها قلة عدد محطات الشحن في الشوارع، وكمان إن فيه فرق بين بروتوكولات الشحن الأوروبي والصيني، وده ممكن يعطّل انتشار العربيات الكهربائية، لكن الحكومة مش سايبة حاجة للصدفة، شغالة دلوقتي على تسعيرة الكيلو وات/ساعة، وبتشجع الشركات تبني محطات شحن في كل مكان، من المدن لحد الطرق السريعة.
الوزير كمان أكد أن العربية لازم تناسب المواطن المصري، يعني تكون سعرها معقول وصيانتها سهلة وقطع غيارها متوفرة فعلا، وأهم حاجة تكون عربية يُعتمد عليها، وده اللي الدولة بتشتغل عليه دلوقتي بكل جدية.
كمان مش بس عربيات ركوب، لأ.. مصنع الأتوبيسات في شركة النصر رجع يشتغل، وبدأ يورد إنتاجه لشركات السياحة ومؤسسات كبيرة، وده دليل إن السوق ابتدى يستعيد ثقته في المنتج المصري، اللي جودته اتحسنت جدًا.
وخلال زيارة أخيرة للمصنع، الوزير شاف بعينه التجهيزات النهائية في مصنع العربيات واللي اتزود بخطوط إنتاج حديثة جدًا، تشمل التجميع واللحام والدهان، وكل ده تمهيدًا لبدء التشغيل الفعلي والإنتاج الكبير خلال الفترة الجاية.
مش بس كده، ده تطوير شركة النصر مش مشروع عادي، دي خطوة استراتيجية مهمة جدًا علشان، نوطن بيها الصناعات الثقيلة ونعزز التصنيع المحلي ونقلل الاعتماد على الاستيراد، كمان عشان نوصل للمواطن المصرية عربية محترمة بجودة عالمية وسعر مناسب.
وطبعا ده كله بيحصل بتوجيهات من القيادة السياسية، علشان نستخدم كل الطاقات اللي عندنا ونقدم منتج محلي يليق باسم "النصر" وتاريخها الطويل كرمز من رموز الصناعة الوطنية.
الخلاصة، أن النصر ده مش مجرد مصنع، دي قلعة صناعية بتقوم من تاني، وبتفتح باب جديد لمستقبل مصر في الصناعة والتكنولوجيا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
