مسلسل هبوط الدولار مستمر.. شوف "ترامب" قال إيه عن "العملة القوية"؟

يا ترى إيه اللي بيحصل للدولار، وليه  بقاله فترة بينزل ومفيش أي إشارة إنه هيرجع يقوى، وهل فعلا إدارة ترامب عايزة تضعفه، ولا هو بيقول حاجة وبيعمل حاجة تانية؟

في تصريح جديد للرئيس الأمريكي دونالد ترامب، قال فيه انه بيحب الدولار القوي بس ضعف العملة الأمريكية بيجيب فلوس كتير، والتصريح ده خلا السوق يضرب أخماس في أسداس، الناس مش فاهم، هو عايز يرفع العملة ولا بيشتغل على تضعيفها علشان ينافس بالتصدير؟

في الحقيقة، اللي بيحصل فعليا هو إن الدولار نازل، ومؤشر بلومبرج للدولار الفوري خسر حوالي 8.5% من أول السنة، وده مش رقم بسيط، ده مؤشر على إن المستثمرين مش مرتاحين خالص للسياسات الاقتصادية اللي بتحصل في أمريكا.

وأكتر حاجة ضغطت على الدولار، هي سياسات ترامب الجمركية اللي كل شوية يعلن عنها، وبعدين يرجع يقول استنوا 90 يوم، وبعدين يمدد المهلة ويبعت خطابات لشركاء أمريكا التجاريين يقولهم "أنا هفرض الجمارك دي في أول أغسطس"، والناس بدأت تحس إن أمريكا داخلة على لعبة “بيع الدولار”.

بس السؤال هنا: هل الوضع ده مفيد للاقتصاد ككل، ولا مجرد مكسب سريع على حساب الاستقرار المالي؟

بص يا سيدي، الأسواق دلوقتي في حالة قلق، والتقلبات دي بتخلي الكل يبعد عن الدولار، ويدور على ملاذ آمن زي الدهب أو اليورو أو حتى الين الياباني.

طب إيه اللي ممكن يحصل بعد كده؟
لو ترامب فضل على نفس النهج، والفايدة فضلت زي ما هي أو نزل فمسلسل هبوط الدولار مستمر، لكن لو الفيدرالي الأمريكي بدأ يدي إشارات على إنه ممكن يرفع الفايدة أو السوق العالمي هدى شوية، ممكن نشوف تصحيح في سعر الدولار، بس حالي الدولار نازل، والناس بتسحب استثماراتها من أمريكا أو بتحولها لدهب وأصول تانية.

والخلاصة، هي ان اللي بيحصل دلوقتي في الدولار مش مجرد صدفة، دي نتيجة سياسة واضحة بتلعب على التصدير والضغط على الشركاء التجاريين، وترامب بيبعت إشارات متناقضة للسوق، وليقول "بحب الدولار القوي"، بس يسيبه ينهار علشان يكسب تصنيع وتصدير.