ليه الدهب في مصر بيقل؟.. هو مش الأونصة عامليا بتغلى؟.. طب ليه الجرام عندنا بينزل؟.. وهل الدولار ليه علاقة.. وإزاي ممكن السعر العالمي يطلع.. واحنا السعر عندنا ينزل؟
في وقت العالم كله واقف فيه على حافة أزمة اقتصادية جديدة، والدهب بره بيكسر أرقام قياسية، السوق المصري عامل عكس الدنيا كلها.. الناس هنا مش فاهمة: ليه الأسعار بتنزل؟ وده معناه نشتري ولا نستنى؟
مفارقة غريبة بين بره وجوه، الأونصة عالميا عدت الـ 3400 دولار، وده رقم تاريخي!
بس في مصر، جرام 21 نزل وبقى حوالي 4710 جنيه، بعد ما كان أعلى من كده بأكتر من 25 جنيه.. و24 كمان نزل لـ5383 جنيه… فـ إيه اللي بيحصل؟
اللي بيحصل أن الطلب قل جدا، الناس مستنية الأسعار تنزل أكتر، فبطلوا يشتروا، ولما الطلب يقل، التجار يقللوا الأسعار علشان يحركوا السوق.
كمان الجنيه ثابت قدام الدولار,, ومفيش تغيرات كبيرة في سعر الدولار، فده خفف الضغط على أسعار الدهب. مش بس كده، ده التجار بقوا يصدروا الدهب بره، بسبب إن الأسعار بره عالية، التجار فضلوا يبعوه للخارج، وده زود المعروض جوا مصر، فالسعر قل.
طب السوق العالمي ماله؟
البنوك الكبيرة زي HSBC وCiti بيقولوا إن فيه احتمال يحصل تصحيح في سعر الأونصة… ممكن تنزل لـ2800 أو 3000 دولار قريب، لو المستثمرين بدأوا يرجعوا للبورصات والأسهم بدل الدهب.
بس في مصر، في حاجتين هيأثروا علينا، وهما سعر الدولار قدام الجنيه والطلب في السوق الداخلي، خصوصًا مع دخول موسم الجوازات والخريف؟
طيب هل الأسعار ممكن تنزل أكتر؟
أغلب التوقعات بتقول: أيوه، في المدى القصير، ممكن نشوف انخفاض بسيط كمان. لكن مع دخول الشتاء والمناسبات، الناس هتبدأ تشتري، والأسعار ممكن تطلع تاني شوية بشوية.
طيب نشتري دلوقتي؟ ولا نستنى؟
لو أنت مستهلك وعايز تشتري للزينة أو مناسبة، دي فرصة كويسة والأسعار تعتبر هادية.
بس لو مستثمر، استنى شوية وراقب السوق العالمي وسعر الدولار، علشان متدخلش في وقت السعر فيه بينزل.
الخلاصة: السوق المصري عامل شغله لوحده، لو الجنيه فضل ثابت، الأسعار ممكن تفضل هادية أو تنزل سنة كمان، ولو الأونصة طلعت جامد، أو حصلت أزمة عالمية، الدهب هيرجع يصعد تاني وبقوة، فخليك متابع، وقرر صح حسب احتياجك وموقفك المالي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
