يا ترى، الصناعة في مصر رايحة على فين، هل بجد بدأنا ندخل مرحلة جديدة من التوسع والتشغيل ولا كل شوية نسمع أرقام وخطط من غير تنفيذ؟
في الساعات الأخيرة، المهندس كامل الوزير نائب رئيس الوزراء ووزير الصناعة والنقل، أعلن موافقة الحكومة على إقامة 3 مصانع جديدة باستثمارات ضخمة بتوصل ل 216.5 مليون دولار.
بس مش كده وبس، المصانع دي هتوفر حوالي 15 ألف فرصة عمل مباشرة، يعني شغل حقيقي مش وعود، وكمان المصانع دي هتكون في العلمين الجديدة والعاشر من رمضان وبني سويف الجديدة، وهيشتغلوا في صناعات زي تصنيع ألواح وأرضيات PVC والملابس الجاهزة والمنسوجات، ودي كلها صناعات كثيفة العمالة وبتستهلك طاقة قليلة، وده مهم جدا علشان نحقق توازن بين التشغيل والحفاظ على الطاقة.
وفي فايدة تانية مهمة، وهي ان الدولة دلوقتي مش بس بتفكر في الاستثمار بس، لكن كمان في التسهيل، يعني الوزير شدد على إن نظام "الشباك الواحد" لازم يتفعل بسرعة في هيئة التنمية الصناعية، علشان المستثمر ميعديش من جهة لجهة وياخد وقت طويل في الترخيص.
كمان، تم الاتفاق على تشكيل لجنة فنية من الوزارات المختلفة لإعادة هيكلة صندوق دعم المناطق الصناعية، وده هدفه الأساسي إنه يخلي البنية التحتية في المناطق دي جاهزة ومستعدة لأي مشروع جديد.
طب إيه علاقة ده بالاقتصاد الأخضر؟
ببساطة، الحكومة وافقت إنها تعتمد المواصفة الأوروبية كمعيار أساسي للسيارات الكهربائية اللي بتدخل أو بتتجمع في مصر، يعني من الآخر أي شواحن كهربا غير معتمدة مش هتدخل البلد، وده لحماية المستهلك وضمان سلامة التشغيل.
مش بس كده، ده في كمان كلام عن تطوير معامل هيئة المواصفات والجودة علشان تقدر تفحص العربيات والشواحن بشكل احترافي ومتوافق مع المعايير الفنية العالمية، و ملف الطاقة حاضر بقوة في النقاشات خاصة الغاز الطبيعي، واللي بيشكل عنصر حيوي لتشغيل المصانع.
كمان، تم التأكيد على ضرورة إعادة جدولة مديونيات المصانع، عشان تفضل شغالة وما تتعطلش، وده من خلال آليات مرنة تضمن حق الدولة وتشجع الإنتاج في نفس الوقت، جت غير خطط تأمين الغاز من خلال زيادة الإنتاج المحلي، وكمان استخدام سفن التغييز لتوفير احتياجات المصانع وقت الضغط.
يعني من الآخر، الدولة بتلعب على كذا وتر في نفس الوقت وهي تشغيل عمالة وجذب استثمار وتسهيل إجراءات وكمان دعم الطاقة، ده غير مراعاة معايير البيئة والجودة، وده معناه إن مستقبل الصناعة في مصر بدأ ياخد شكل جديد، مبني على التكامل والسرعة والتخطيط المحترف.
السؤال بقى.. هل هنشوف المشاريع دي تتحول لحقيقة على الأرض، وهل مصر تقدر تخلق نموذج صناعي ناجح ينافس في التصدير والتشغيل؟
اللي جاي هيجاوب، بس البداية شكلها مبشر جدا
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
