رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك مهم للمركزي، وتراجع كبير للدولار، وارتفاع كبير لصادرات الذهب.
نبدأ من القطاع المصرفي.. البنك المركزي المصري أعلن إنه سحب سيولة بحوالي 502.4 مليار جنيه في عطاء السوق المفتوحة من 16 بنك النهارده التلات 22 يوليو 2025.. وده بعد قراره الأخير إنه يعدل سياسات قبول العطاءات بفائدة 24.5%.
الأسبوع اللي فات يوم التلات 15 يوليو 2025.. المركزي كان سحب سيولة محلية من البنوك العاملة في القطاع المصرفي بحوالي 310.4 مليار جنيه من 19 بنك.. وده عشان يسد عجز الموازنة.
في أبريل اللي فات.. البنك المركزي قرر يعدل نظام العطاء الأسبوعي بحيث يقبل كل طلبات البنوك اللي بتتقدم للعطاء بدل ما يخصص حصة معينة لكل بنك.. وده سمح إنه يسحب أموال أكتر من البنوك اللي عندها سيولة زايدة خصوصًا مع التضخم العالي اللي البلد عايشة فيه.
المركزي عنده آليتين أساسيين لسحب السيولة من البنوك.. أول واحدة هي العطاء الأسبوعي اللي مدته 7 أيام وبفائدة ثابتة بيحددها يوم التلات من كل أسبوع.. ودي الآلية اللي بقى يعتمد عليها بشكل موسع الفترة الأخيرة.. أما الآلية التانية فهي عطاء 28 يوم بفائدة متغيرة بتساوي متوسط سعر العائد على الإيداع والإقراض.
نروح لـ سوق العملات الأجنبية.. الدولار سجل تراجع قدام الجنيه النهارده جوه البنوك العاملة في مصر.. وسعره في البنك المركزي المصري وصل لـ 49.19 جنيه للشراء و49.29 جنيه للبيع.. حسب الموقع الرسمي للبنك.
وسعر الدولار في البنوك كان كالتالي:
البنك الأهلي المصري: 49 جنيه للشراء و49.10 للبيع.
البنك الأهلي الكويتي: 49.22 للشراء و49.32 للبيع.
البنك العقاري المصري العربي: 49.43 للشراء و49.53 للبيع.
البنك العربي الإفريقي الدولي: 49 للشراء و49.10 للبيع.
البنك المصري الخليجي: 48.98 للشراء و49.08 للبيع.
بنك أبو ظبي الإسلامي: 49.22 للشراء و49.32 للبيع.
بنك الإسكندرية: 48.98 للشراء و49.08 للبيع.
بنك البركة: 49 للشراء و49.10 للبيع.
نروح لـ سوق الدهب.. إيهاب واصف رئيس شعبة الذهب والمعادن الثمينة في اتحاد الصناعات أعلن إن صادرات القطاع من يناير ليونيو حققت نمو قياسي بنسبة 194%.. وصلت لـ 3.93 مليار دولار مقابل 1.34 مليار دولار في نفس الفترة السنة اللي فاتت.
وأضاف واصف – حسب تقرير شعبة الذهب والمعادن الثمينة واللي اعتمد على بيانات هيئة الرقابة على الصادرات والواردات – إن الإمارات هي أكتر دولة بتستورد الحلي والأحجار الكريمة والدهب من مصر بقيمة 3.2 مليار دولار في نص السنة الحالي.
بعدها بتيجي سويسرا اللي استوردت دهب مصري بـ 705 مليون دولار.. وبعدين كندا بـ 6.3 مليون دولار.. وبعدها تركيا بـ 5.3 مليون دولار.. وبعدين لبنان وإيطاليا والسعودية.
ونختم بخبر من بنك مصر.. اللي وقع بروتوكولين تعاون مع مؤسسة مصر الخير.. عشان يميكن كل عمليات المدفوعات والتحصيلات المالية للمؤسسة.. وده دعمًا للتحول الرقمي والشمول المالي.. وكمان هيقوموا بتنفيذ 5 قوافل طبية متخصصة للأشخاص ذوي القدرات الخاصة في محافظات: الدقهلية.. الشرقية.. الإسكندرية.. البحيرة.. والمنيا.
البروتوكول ده جاي في إطار توجه الدولة لتطبيق نظام الدفع الإلكتروني في كل القطاعات والتحول لمجتمع غير نقدي.. وده هيمكن مؤسسة مصر الخير إنها تدير كل عملياتها المالية بشكل لحظي وبشفافية.. وكمان بنك مصر هيقدم للمؤسسة حلول مصرفية متكاملة.. والبروتوكول ده يعتبر خطوة جديدة ضمن خطة البنك للتحول الرقمي وتوطين الخدمات التكنولوجية لتسهيل عمليات الدفع على المواطنين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
