مصر تنطلق إلى العالمية من بوابة "سفاجا 2".. حكاية أقوى محطة لوجستية عملاقة

ليه مصر بتعمل محطة "سفاجا 2"؟.. وهل المحطة مخصصة للبضايع فقط ولا هتخدم كمان الركاب والسياحة؟.. المحطة دي هتقدر تستوعب قد إيه من الحاويات أو البضايع؟.. وهل هتكون مجهزة لاستقبال سفن الحاويات الكبيرة ولا لأ؟

"أنت متخيل إن مصر بتتحول دلوقتي لمركز لوجستي ضخم على البحر الأحمر.. وهنا الكلام عن محطة لوجستية عملاقة اسمها سفاجا 2، ودي هتتبني جوه ميناء سفاجا البحري، واللي الهدف منها تحويل المينا لمحور نقل وتجارة إقليمي يخدم الصعيد والبحر الأحمر وكمان يربطنا بالخليج وشرق آسيا.

المحطة دي مش مجرد مخازن، دي هتكون مؤهلة لاستقبال البضايع والحاويات وتفريغها وتخزينها، وكمان فيها تجهيزات حديثة للنقل السريع والمبرد وكل الخدمات اللوجستية اللي بتخطر على بالك، ومش بس كده.. المشروع هيقلل الضغط على مواني تانية زي العين السخنة والسويس، وكمان هيكون فيه ربط مباشر بين المينا وشبكة الطرق الجديدة عشان يوصل البضايع لأهل الصعيد بسرعة وكفاءة.

الموضوع بدأ.. لما وزارة النقل أعلنت عن بداية تنفيذ مشروع ضخم جديد اسمه "سفاجا 2"، وده محطة لوجستية متعددة الأغراض جوه ميناء سفاجا البحري، المحطة دي جزء أساسي من مشروع أكبر اسمه ميناء سفاجا الكبير، وده بيتم على ساحل البحر الأحمر كخطوة استراتيجية بتحقق رؤية الدولة لتحويل مصر لمركز لوجستي عالمي في مجالات النقل – الترانزيت – والتجارة الدولية.

محطة سفاجا 2 بتتعمل على مساحة حوالي 776 ألف متر مربع، وبتضم رصيف بطول 1100 متر وعمق 17 متر، يعني تستقبل سفن ضخمة وحاويات بكفاءة عالية.. والمفاجأة السارة كمان أن أعمال البنية التحتية خلصت بالكامل، ونفذتها شركات مصرية وطنية، ودلوقتي شغالين على البنية الفوقية بأحدث المعايير العالمية.

مش بس كده.. ده المحطة لما تشغل بكامل طاقتها، هتقدر تتعامل مع 2 مليون حاوية سنويًا، وكمان 7 مليون طن بضايع عامة... وده هيزود القدرة التنافسية للميناء وهيخليه محور تجاري ضخم في المنطقة.. المشروع مش بس لوجستي، دي كمان بوابة بحرية رئيسية لتنمية الصعيد، لأنها بتخدم الأنشطة التعدينية في المثلث الذهبي (سفاجا–القصير–قنا)، وكمان بتسهل التصدير والاستيراد لمناطق شمال ووسط وجنوب الصعيد.

كمان المحطة جزء من ممر لوجستي متكامل (سفاجا – قنا – أبو طرطور)، واحد من 7 ممرات دولية مصر شغالة عليهم علشان تبقى مركز للتجارة بين آسيا وأوروبا وأفريقيا.

والمميز بقى؟.. إن ميناء سفاجا هيتربط بخط القطار الكهربائي السريع، وده هيقلل الاعتماد على النقل البري، ويخفف الزحمة على طرق الصعيد، خاصة في محافظات زي قنا وأسيوط والأقصر وأسوان.

الخلاصة.. أن "سفاجا 2" مش مجرد محطة، ده مشروع بيفتح باب جديد لمستقبل اقتصادي أقوى، ونقلة نوعية في البنية التحتية والنقل في مصر.