يا ترى إيه هو الفوسفات اللي مصر ناوية تستكشفه؟.. طب احنا كمواطنين هنستفاد إزاي من الاكتشاف ده؟.. ويا ترى الفوسفات ده أصلا بنستخدمه في إيه؟.. وليه مهم للبلد..
واضح إن مصر ناوية تستغل كل كنوزها اللي تحت الأرض، والخطوة الجديدة؟.. اتوقعت مذكرة تفاهم مهمة جدًا بين وزارة البترول المصرية وشركة "آسيا بوتاش" الصينية، بعد ما قررنا نشتغل معاهم سوا في استكشاف وتقييم احتياطيات خام الفوسفات.
يعني باختصار كده، احنا مش بس هنقعد نتفرج على الفوسفات وهو مدفون في الأرض، لا دلوقتي فيه شغل جد بيبدأ عشان نعرف الكمية اللي عندنا ونستغلها بأحسن طريقة.
كمان الشركة الصينية دي هتشارك بخبرتها وتقنياتها في الاستكشاف والتحليل، وده هيساعدنا نوصل لأرقام دقيقة وخرائط واضحة عن الفوسفات الموجود في أراضينا.
طيب ده معناه إيه؟
يعني فرص استثمارية أكبر وشركات تانية ممكن تيجي تستثمر بعد ما تشوف النتايج، وكمان فرص شغل للشباب في المجال ده.. والأهم؟ إننا نبني صناعة قوية حوالين الفوسفات بدل ما نفضل نبيعه خام.
التعاون المصري الصيني ده بيأكد إن مصر ماشية بخطوات محسوبة عشان تحول الموارد الطبيعية لقوة اقتصادية حقيقية.
والسؤال اللي لازم نسأله.. هو احنا مستعدين نشوف مصر كقوة كبيرة في مجال الفوسفات والأسمدة؟
طبعا هنشوف مصر قوة كبيرة، وده بعد الخطوة الجديدة اللي مصر خدتها لتطوير قطاع التعدين في مصر، بعد ما وزير البترول كريم بدوي حضر توقيع مذكرة تفاهم مهمة جدًا بين الهيئة المصرية العامة للثروة المعدنية وشركة آسيا بوتاش الصينية.
المذكرة دي هدفها إننا نشتغل سوا على استكشاف وتقييم احتياطيات خام الفوسفات، وكمان نعظم القيمة المضافة من المورد الحيوي ده، بدل ما نكتفي نطلعه خام ونصدره.
الوزير أكد بعد التوقيع أن التعاون ده جزء من خطة الوزارة لتطوير قطاع التعدين، وإنهم عايزين يرفعوا مساهمته في الاقتصاد من أقل من 1% لـ 5 أو 6%.
يعني مش بس تنقيب، إحنا بنتكلم عن شغل متكامل، عبارة عن استكشاف وتقييم وإثراء ومعالجة ودراسة إنشاء مصنع حديث لإنتاج الأسمدة الفوسفاتية.:
الوزير شدد على إن التنفيذ لازم يبدأ فورًا، وعمل اجتماعات متابعة بشكل دوري، علشان المشروع مايتأخرش والتزامات الطرفين تمشي حسب الجدول.
طيب يعني إيه فوسفات؟.. هو معدن مهم جدا بنستخدمه في حاجات كتير زي تصنيع الأسمدة اللي بتخلي الزرع يكبر بسرعة وصناعة الأدوية وحتى بعض أنواع المنظفات، يعني مش بس بيفيد الزراعة، ده كمان ليه استخدامات صناعية وطبية.
طيب احنا هنستفاد إزاي؟
أول حاجة، مصر بقت من أكبر الدول اللي عندها احتياطي فوسفات وده معناه فرصة تصدير ضخمة تجيب عملة صعبة، ونقلل الاستيراد، تاني حاجة الدولة بدأت تفكر تعمل مجمعات صناعية متخصصة لتصنيع الأسمدة من الفوسفات بدل ما نصدره خام.
تالت حاجة، المناجم الجديدة دي هتوفر فرص شغل كتير جدًا لأهالينا في المحافظات الحدودية والصعيد، يعني ببساطة الفوسفات مش مجرد صخر في الأرض، ده باب رزق جديد، ومصدر قوة لمصر في السوق العالمي.
الخلاصة، أن مصر بتتحرك بخطوات واضحة، وبتبني شراكات قوية علشان تخلي التعدين واحد من أعمدة الاقتصاد في المستقبل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
