يا ترى إيه اللي هيحصل في أسعار الفايدة قبل ما 2025 تخلص، وليه الفايدة بقت كلمة السر في حركة الاستثمار وسعر الجنيه وحتى الأسعار في السوق، والبنك المركزي ناوي بعمل ايه الفترة الجاية؟
من بداية السنة، لجنة السياسة النقدية في البنك المركزي المصري عقدت 4 اجتماعات، وده كان في 20 فبراير، وكمان في 17 أبريل، وفي 22 مايو، وبردو في 10 يوليو.
وبكده، يكون اتبقى 4 اجتماعات تانية قبل ما تخلص سنة 2025، أما بقى المواعيد الرسمية اللي أعلنها البنك المركزي على موقعه الإلكتروني فهي 28 أغسطس، و2 أكتوبر، و20 نوفمبر، و25 ديسمبر.
طيب إيه اللي ممكن يحصل في الاجتماعات دي؟
خلينا نفتكر إن هدف لجنة السياسة النقدية الأساسي هو السيطرة على التضخم، مش مجرد تحريك الفايدة وخلاص، يعني لو التضخم نزل، ممكن يقللوا الفايد، أما بقى لو زاد فهيضطروا يثبتوها أو يرفعوها.
وحاليا، التضخم بدأ يهدى شوية مقارنة ببداية السنة، بس لسه عند مستويات تعتبر مرتفعة، عشان كده البنك المركزي الفترة اللي فاتت كان ماشي بحذر، وبعض الاجتماعات خرج منها بقرار تثبيت الفايدة عشان يشوف اتجاه الأسعار هيروح لفين.
وفي احتمال يحصل خفض، وده في حالة لو استمر التضخم في الانخفاض، خاصة في اجتماع نوفمبر أو ديسمبر، ممكن نشوف خفض تدريجي للفائدة، وده هيكون خبر حلو لرجال الأعمال، والمصانع، واللي عندهم قروض.
بس في نفس الوقت، اي قرار بخفض الفايدة لازم يراعي كمان وضع الجنيه، لان الفايدة العالية كانت من الأسباب اللي بتجذب المستثمرين الأجانب لأذون الخزانة، ولو الفايدة قلت فجأة، ممكن بعضهم يخرج وده خيأثر على سعر الصرف.
طيب إيه اللي هيحصل في الاجتماع الجاي يوم 28 أغسطس؟
التوقعات حاليا بتقول إن في احتمال كبير يتم تثبيت الفايدة، إلا لو ظهرت بيانات جديدة عن انخفاض حاد في التضخم، ووقتها ممكن يفاجئنا المركزي بخفض بسيط.
وفي النهاية،. نقدر نقول ان ال 4 اجتماعات اللي باقيين في 2025، هيحددوا شكل السياسة النقدية في مصر السنة الجاية كلها، هل هنبدأ في دورة خفض الفايدة تدريجيا، ولا هنكمل سياسة التثبيت لضمان استقرار الجنيه وكبح التضخم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
