هل تتجه الحكومة لرفع أسعار البنزين والسولار بسبب التحديات الأقليمية؟

في ناس كتيرة مترقبة الزيادات الجديدة اللي هتحصل في اسعار البنزين والسولار.. ياتري هل الحكومة هتعلن عنه قريب والاسعار الجديدة هتوصل لكام.

التوترات الاقتصادية والسياسية اللي حصلت في الوقت اللي فات فرضت تحديات جديدة علي الحكومات في الدول، وخلت اغلب الدولة بقت مجبرة علي تعديل اسعار عدد كبير من الخدمات اللي بتقدمها للمواطنين خصوصا اسعار المواد البترولية زي البنزين والسولار وانبوبة البوتاجاز واسعار شرائح الكهرباء.

الشائعات الكتيرة اللي بتحصل في الشارع المصري الحكومة كل يوم بتطلع ترد عليها وكان أخرها الشائعة الي سربتها عدد من الجهات واللي أكدت عن وجود مناقشات في مكاتب الحكومة لتعديل اسعار المواد البترولية، والحكومة طلعت ونفت الكلام ده تماما، وقالت ان مش هيتم تغيير الأسعار الحالية للمنتجات البترولية قبل انتهاء مدة الـ 6 أشهر واللي حددتها الحكومة، وده من منطلق حرص الدولة على مراعاة البعد الاجتماعى وتخفيف الأعباء عن المواطنين.

لازم نكون عارفين أن غالبية الدعم الحكومي الدولة بتوجهه لدعم منتجات السولار والبوتاجاز وبنزين 80/ 92 لتخفيف الأعباء عن كاهل المواطن، وده علي الرغم من أن الدولة بتعتمد علي تغطية احتياجات السوق المصري وبتستورد حوالى 40 % من كمية استهلاك منتج السولار و 50 % من كمية استهلاك  منتج البوتاجاز و 25 % من كميات استهلاك منتج البنزين .

الدعم اليومى اللي بتتحمله الحكومة وفقا للأسعار المعلنة واللي بتتحمله الدولة نتيجة الفجوة بين الأسعار والتكلفة الفعلية بيوصل لحوالي 366 مليون جنيه يوميا بما يعادل 11 مليار جنيه شهريا.

طيب اسعار المواد البترولية بيوصل لكام دولوقتي؟

أخر قرار للجنة تسعير المواد البترولية لتعديل اسعار البنزين والسولار في مصر كان في شهر أبريل ووقتها الحكومة قررت تعديل اسعار بنزين 95 من 17 إلى 19 جنيه للتر، نزين 92 من 15.25 إلى 17.25 جنيه للتر، وبنزين 80 من 13.75 إلى 15.75 جنيه للتر، والسولار من 13.5 إلى 15.5 جنيه للتر، والكيروسين من 13.5 إلى 15.5 جنيه للتر، وأُسطوانة البوتاجاز المنزلي 12.5 كجم من 150 إلى 200 جنية، وأسطوانة البوتاجاز التجاري من 300 جنيه إلى 400 جنيه .