يا ترى أنت مع فكرة إنك تستثمر في الذهب من غير ما تشتريه فعليًا؟.. ولا بتحب تمسك الجرام بإيدك؟.. ولو عندك مبلغ صغير هتشتري بيه دهب ولا هتدخل بيه صندوق الاستثمار المصري؟.
من سنتين فاتوا، البنك المركزي وهيئة الرقابة المالية أعلنوا عن إطلاق أول صناديق استثمار في الذهب بشكل رسمي في مصر.. يعني إيه الكلام ده؟ يعني بدل ما تروح تشتري دهب وتخاف من الغش أو السرقة أو التخزين، دلوقتي تقدر تستثمر في الدهب من غير ما تمسكه بإيدك
طيب بتدخل في الموضوع ده إزاي؟.. الصناديق دي بتشتري دهب حقيقي وتحطه في خزنة، وإنت بتشتري وحدة من الصندوق، واللي بيحصل على سعر الدهب يوم بيوم.. يعني لو سعر الدهب طلع.. إنت كسبت.. ولو نزل – لا قدر الله – يبقى فيه مخاطرة بسيطة زيه زي أي استثمار.
تعالوا أقولكم كل التفاصيل، وليه الدولة عملت كده؟.. في خطوة جديدة ومهمة، الدولة بتتحرك علشان توسّع أدوات الاستثمار وتفتح مجالات جديدة للمواطنين.. مين فينا مبيحبش الدهب؟
بس المرة دي مش هتشتريه من الجواهرجي، لأن الدولة أطلقت صناديق استثمار في الذهب، يعني تقدر تستثمر في الدهب من غير ما تشتري جرام واحد بإيدك
طيب الهدف منه إيه؟
هو إنك تقدر تحوش وتستثمر بطريقة آمنة ومنظمة، تناسب كل الناس، سواء كنت مستثمر كبير أو حتى بتحوش مبلغ صغير، ومن خلال البنوك والشركات المرخصة، تقدر تشتري وثيقة استثمار في الدهب، وكأنك بالضبط اشتريت جزء من سبايك دهب حقيقية محطوطة في خزنة.
الدولة عاملة نظام قانوني وتنظيمي كامل علشان تحمي المستثمرين وتخلي السوق جاذب وآمن.
وعلشان كده بقى فيه صندوق AZ-Gold من مايو 2023 ووصندوق بلتون سبائك من يناير 2024 وصندوق الأهلي ذهب من يونيو 2024
والأرقام بتقول إن عدد الناس اللي دخلوا المجال ده زاد من 79 ألف في يناير لـ166 ألف في ديسمبر، والأصول المدارة كبرت من 836 مليون لـ1.3 مليار جنيه.. ده معناه إن الناس بقت شايفة إن دي وسيلة تحوط ذكية وبتحافظ على قيمة فلوسها في ظل الأسعار اللي بتتلخبط كل شوية.
المهم أن الناس بقت بتدور على أدوات استثمار حقيقية، والدهب طلع نجم الشباك، مش بس كوسيلة أمان، لكن كمان كوسيلة لتنمية رأس المال، وبنك جي بي مورجان بيتوقع إن الاستثمار في صناديق الدهب لسه قدامه فرصة كبيرة، خصوصًا مع توقعات انخفاض الفايدة في 2025.
يعني ببساطة، اللي معاه شوية فلوس، ممكن يخليهم يشتغلوا في الدهب، بدل ما يفضلوا نايمين تحت البلاطة
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
