يا ترى يعني إيه إن الفضة تعدي ال38 دولار، وإيه علاقة ده بأزمة المعروض وارتفاع تكاليف التمويل، وليه بقى المعدن الرمادي حديث السوق دلوقتي؟
في الأيام الأخيرة، حصلت قفزة كبيرة في سعر الفضة عالميا، وكسرت الأوقية حاجز ال38 دولار لأول مرة من سنة 2011، وسجلت مكاسب أسبوعية بحوالى 4%، رغم إن البورصات كانت فى عطلتها الأسبوعية.
يعني ببساطة.، الفضة رجعت للواجهة تاني وبقوة كمان، ودع لعدة اسباب، أولها نقص المعروض، يعني الفضة بقت عملة نادرة في السوق، بسبب تراجع الإنتاج في دول كبيرة زي روسيا والمكسيك، والاعتماد الكبير على الفضة الثانوية المستخرجة من معادن تانية، واللي مش مكفية الطلب العالمي اصلا.
ثاني سبب معانا، هو الطلب الصناعي العالي، فالفضة مش بس معدن للتخزين، لأ ده هي كمان هي مكون أساسي في التكنولوجيا والطاقة النظيفة، خاصة في الألواح الشمسية والخلايا الضوئية، ومع توسع العالم في الطاقة المتجددة، فالطلب على الفضة بقى عالي جدا، وده بيزود سعرها.
تالت حاجة، هي ارتفاع تكاليف التمويل، يعني مع قلة السيولة في بورصة لندن وارتفاع فوايد الاقتراض، فالشركات والمستثمرين بقوا بيدفعوا زيادة علشان يقدروا يمسكوا الفضة وده رفع الأسعار أكتر بردو، والكلام ده معناه إن اللي بيشتري دلوقتي بيدفع غالي واللي عنده فضة بيكسب جامد.
وطبعا، كل ده حصل في نفس وقت تصعيد ترامب للحرب التجارية مع كندا وباقي الدول، فالريس الأمريكي أعلن عن رسوم جمركية ضخمة على واردات زى النحاس والفضة، وده عمل دوشة كبيرة في أسواق المعادن، خاصة وان العلاقة وثيقة جدا بيت القصة والنحاس، لأن الصناعات اللي بتستخدم النحاس بتستخدم الفضة بردو، ولما النحاس زاد 13% الأسبوع ده، الفضة طارت معاه.
وسعر جرام الفضة في مص، وصل دلوقتي ل64 جنيه لعيار 999، و51.25 جنيه لعيار 800، وسعر الجنيه الفضة سجل حوالي 476 جنيه، وده معناه إن السوق المحلي كمان حس بالحركة حتى مع عطلة البورصات العالمية.
ومن بداية 2025، الفضة زادت بنسبة 34%، والناس رجعت تركز معاها كمعدن آمن واستثماري في وقت الأزمات، خاصة إن الذهب والبلاتين كمان بيطلعوا، عشان كده متوقع إن الفضة توصل ل 40 دولار قريب جدا، وممكن تكمل ل46 دولار قبل نهاية 2025، خاصة مع دخول استثمارات ضخمة في السوق.
والخلاصة، هي إن الفضة راجعة وبقوة، مش بس كزينة أو معدن رمادي، لأ دي بقت ملاذ آمن واستثمار صناعي وأصل مالي بيدي عوائد ضخمة، ومع أزمة المعروض، وارتفاع تكاليف التمويل وزيادة الطلب، الفضة ممكن تكون مفاجأة السوق في النص التاني من السنة، فلو ناوي تستثمر فيها هتكسب هتكسب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
){kind=link}