قدّم رجل الأعمال نجيب ساويرس، مجموعة من النصائح المالية والحياتية المهمة خلال مداخلة مع الإعلامي سيد علي ببرنامج "حضرة المواطن"، تحدث فيها عن رؤيته لإدارة الفائض المالي، وأكد أن النجاح لا يتحقق بالذكاء وحده، بل يتطلب عملاً جادًا وإيمانًا وصبرًا.
وقال ساويرس: "الواحد دايمًا ما يبقاش نص عاقل ونص مجنون يعني، لازم يخطط لنفسه. يعني يقسم الفائض اللي عنده ده لتلات أربع أجزاء. جزء يبقى نقدي علشان لو اتزنق، ما يتزنقش. ربع نقدي، وربع في العقار، وربع في الذهب، وربع في الأسهم أو السندات اللي بتديله دخل ثابت. هو ده العقل، إن الواحد ما يحطش كل الفائض بتاعه في وعاء واحد. زي ما بيقولوا: Don't put all your eggs in one basket".
وأضاف: "أي فائض، حتى لو قليل. يعني لو معاه مليون أو مليون ونص، أو حتى لو يقدر يشتري جنيه دهب واحد. الفكرة مش في الرقم، الفكرة في توزيع الفائض ده: جزء نقدًا، جزء عقار، جزء في أسهم وسندات، وجزء في الذهب".
نصيحتي للشباب: الذكاء وحده لا يكفي
وحين سُئل عن نصيحته للشباب، خاصة أولئك الذين يعتبرونه قدوة ويرغبون في الوصول لما وصل إليه، قال ساويرس بوضوح: "أول حاجة، إذا كنت فاكر إن الذكاء هيوصلك للنجاح لوحده، يبقى مش هتوصل. لازم تؤدي عمل جاد، 12 ساعة في اليوم على الأقل، خصوصًا وأنت صغير، عندك طاقة وقدرة. من غير الاجتهاد والعمل الجاد الدؤوب، مش هتوصل لحاجة."
وشدد ساويرس على أهمية الإصرار وتجاوز العوائق، فقال: "ما يكونش عندك يأس. مش أول ما تلاقي عائق تقول لأ ما أنا جربت وما نفعتش. ما فيش حاجة ما تنفعش. هتقابلك آلاف من العوائق، لكن المهم إنك تتعلم إزاي تتغلب على كل عائق، ويبقى عندك إصرار وصمود".
الإيمان بالله أساس النجاح
واختتم ساويرس نصيحته بالتأكيد على أهمية الإيمان، فقال: "لازم يبقى عندك إيمان بربنا، لأن في الآخر ربنا هو اللي بيقرر النجاح من الفشل. ما تخليش الغرور يصيبك، ولا أي حاجة، لأن النجاح والفشل في الآخر بإيد ربنا."
اقرأ ايضا
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
