رسالة عاجلة من الخطيب للاعبي الأهلي قبل العودة للدوري

حرص محمود الخطيب رئيس مجلس إدارة النادي الأهلي، على الاجتماع باللاعبين والجهاز الفني قبل مباراة إنبي المقبلة، في اللقاء الذي يجمع الفريقين، ضمن مباريات الجولة السادسة من مسابقة دوري نايل.

رسالة الخطيب للاعبي الأهلي في اجتماع اليوم بالتتش

قال محمود الخطيب في رسالة، نشرتها الصفحة الرسميى للنادي الأهلي: «الكابتن وليد والكابتن عماد وكل الطاقم الموجود، هما أخواتكم، هما المسئولين مسئولية كاملة عن كل ما يخص الفريق الأول.. عايز أتكلم معاكم، ككورة، الكرة مش أسماء، الكرة جدعنة ورجولة، واسبرينتات واحتكاك، الكرة مش أسماء أبدا، خدوا بالكم، إحنا في استاد مختار التتش رحمة الله عليه، أحد الأساطير، مرورًا بوجود سيادتكم وكلهم كانوا أحسن منا، كله راح وأنتم دلوقتي وجهة النادي».

وتابع: «كلنا بنزول، والأهلي اللي باقي، وإن شاء الله سيبقى، اللي صنع الاسم ده مين الأهلي، والأهلي بيصنع أسماء كل يوم، مينفعش الناس تلعب بأسمائها، الناس تلعب بمجهودها وتكون رجالة، الفترة اللي فاتت، مكنتش أحب أبدا تكون موجودة معاكم أنتم، الأهلي كيان، الأهلي تاريخ، الأهلي مبادئ، الأهلي قيم، والأهلي هيبقى كده».

وواصل: «الأهلي هيذكر اللي هيمشي على نفس الخط بتاعه، لازم نفكر يا رجالة في الكلام ده.. إحنا النهارده ناويين نقدم إيه ونعمل إيه».

واختتم: «وأنا اتكلمت معاكم قبل كده، واضح إن إحنا نسينا، إزاي تقدروا جماهير الأهلي وتحترموا كيان النادي، هو ده المطلوب منكم، النادي الأهلي بيصبر لكن مبيقبلش أي حاجة غير اللي هيساهم في رفع اسم كيان هذا النادي، ده اللي إحنا هنقبله بس أنا عندي ثقة كبيرة في كل واحد فيكم، ننسى الفترة اللي فاتت، نشطب عليها، ونشوف اللي جاي إيه، وأنا متأكد يا رجالة، لو التركيز زاد، الموضوع إن شاء الله تحققوا كل اللي تتمنوه، واللي الجماهير تتمناه، حافظوا على تاريخكم تاريخ ناديكم، نقدر جماهيرنا ونحترمهم، وإن شاء الله كلنا نمد إيدينا ونقرأ الفاتحة».