في صناعة جديدة الدولة وأخذها تحدي في عالم الطاقة النظيفة وهتوطنها خلال وقت قريب قوي وهتكون منفذ جديد للدولار في الناتج القومي.. ياتري اية هيا الصناعة دي .. وآية فائدتها علي الاقتصاد المصري.. وآية سر اهتمام الحكومة بيها.
التحول الي استخدام والتوسع في الطاقة المتجددة بقي واحد من الأهداف الأساسية للدولة في الوقت الحالي، خصوصا أن تكلفة تشغيل وبناء المحطات التقليدية بقت كبيرة جدا ده غير أننا عندنا أزمة اصلا في تشغيلها بسبب نقص الغاز الطبيعي والمازوت اللي هما العصب الاساسي في التشغيل للمحطات، ده غير أن مصر عندها إلتزام دولي من وقت استضافتها لمنتدي التحول الي الاخضر كوب 27 بتقليل الانبعاثات الكربونية والحفاظ علي المناخ والتوسع في مجالات الطاقة الجديدة والمتجددة.
بناء علي النقط دي كلها، الدولة اخذت قرار بالتوسع في استخدامات الطاقة الجديدة وحطت نقط واضحة وصريحة في الاستراتيجية الوطنية للطاقة واللي بتهدف الي الوصول بحجم الطاقة المتجددة علي الشبكة الموحدة للكهرباء الي 42% في 2030، وهنوصل لـ65% من حجم الاستهلاك المحلي للطاقة علي الشبكة في 2040، وده رقم كبير جدا وهيوفر لمصر مليارات الدولارات بتدفعهم سنويا لاستيراد الغاز الطبيعي والمازوت لتشغيل محطات التوليد العادية، ده غير أن طاقة مستدامة لفترات طويلة بتوصل لأكثر من 25 سنة .
من هنا الدولة ممثلة في وزارة الكهرباء والطاقة المتجددة بدأت تشتغل وتوسع في استخدامات وإنتاج الطاقة المتجددة، بس بقي عندنا تحدي تاني وهو إنتاج ألواح الطاقة الشمسية والتروبيات اللي بتدخل في تشغيل وبناء محطات الرياح، وهنا الدولة اخذت قرارت بتعديل التشريعات اللي بتحكم قطاع الكهرباء في مصر، وفتحت الباب قدام شركات القطاع الخاص المستثمرين علشان يدخلوا السوق المصري ويعملوا محطات توليد للكهرباء من الشمس والرياح، وكمان يفتحوا مصانع لإنتاج محطات الطاقة الشمسية واللي هيا عليا الطلب الأكبر في مصر.
مش كده بس لا ده كمان الدولة عملت حملات ترويج مكثفة للمواطنين لزيادة الإقبال علي تركيب محطات طاقة شمسية وسخانات الطاقة الشمسية فوق البيوت وفي الشركات والمصانع، وده بهدف ترشيد استهلاك الكهرباء، واعلنت كمان عن إمكانية شراء الطاقة اللي هتزيد عن استهلاكهم اليومي من خلال نظام عدادات مخصص للنقطة، واللي بيسمح بضخ الكهرباء علي الشبكة الموحدة للكهرباء في وقت ما يكون في زيادة، ويأخذ كهرباء من علي الشبكة وقت ما يكون في نقص في الإنتاج خصوصا في ساعات الليل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
