في أزمة كبيرة هتحصل في سوق السيارات الكهربائية في مصر وهتاثر علي الإقبال ومعدلات الشراء في الأسواق.. ياتري اية هيا الأزمة دي .. وازاي هتاثر علي معدلات البيع والشراء في مصر .. واشمعني هتاثر علي السيارات الكهربائية بالذات دونا عن باقي الانواع المتاحة في الأسواق .
علي مدار الشهور اللي فاتت في توجه جامد جدا من الحكومة للمواطنين للتوسع في شراء السيارات الكهربائية، خصوصا انها بتدعم خطة مصر للتحول الي الاخضر، وبتساهم في تقليل الانبعاثات الكربونية، وكمان هيا بتعد سيارات المستقبل وكل الناس بتدور عليها، واللي هيكون عليها كل الطلب خلال الوقت اللي جاي .
في عز ما الدولة بتروج لصناعة السيارات الكهربائية في مصر، وزارة الكهرباء والطاقة المتجددة اخذت قرار بزيادة أسعار شحنها سواء كان الشحن ده من البيت أو من خلال محطات شحن السيارات اللي بقي موجودة في مناطق كتيرة في مصر .
قرار جهاز تنظيم مرفق الكهرباء وحماية المستهلك اللي نشرته الجريدة الرسمية الوقائع المصرية، تضمن أنه فى حالة الشحن من المنزل، المستهلك هيتمتع بنفس أسعار الشرائح المنزلى، وعلي سبيل المثال لو السيارة الكهربائية بتمشي ألف كيلو وات فتحتاج شحن من 130 إلى 200 كيلو وات، وهتوصل تكلفة الكيلواوات ساعة لـ 95 قرش، وفي حالة اكتمال عملية الشحن لبطارية السيارة الكهربائية بقدرة 200 كيلو وات ساعة علشان يكفيها تمشي الف كيلو متر فتكون اجمالى التكلفة 190 جنيه.
أما في حالة لو الموطن شحن عربيته من محطات شحن السيارات الكهربائية هيوصل سعر الكيلو وات ساعة الي 169 قرش، وهتوصل تكلفة شحن 200 كيلو وات ساعة علشان يكفي مسافة ألف كيلو متر 338 جنيه، والتكلفة دي بترتفع من محطة شحن للتانية الي حسب سرعة الشحن وبتوصل ل 750 جنية في حالة الشحن السريع، خصوصا أن ثمن الكيلواوات ساعة بيوصل لـ375 قرش .
طيب ليه الدولة زوت أسعار شحن السيارات الكهربائية اصلا في التوقيت ده ؟.
في أكثر من سبب كانوا هما البطل في قرار الدولة بزيادة أسعار شحن السيارات الكهربائية أولهم ارتفاع تكاليف التوريد والتشغيل خصوصا أن أغلب مهمات الكهرباء بتكون مستوردة من الخارج بالدولار وطبعا في اختلافات فرق سعر الصرف كان لازم يكون في زيادة في الأسعار المحلية، ده غير أن محطات شحن السيارات بتعتبر مكلفة جدا، وبالتالي الدولة كانت لازم تزود الأسعار .
في سبب كمان لقرار الدولة بزيادة أسعار شحن السيارات الكهربائية وهو أن السعر القديم كان مدعوم من الحكومة، والتعريفة الأصلية كانت مصممة علشان تشجيع المواطنين علي التحويل للسيارات الكهربائية، ده غير أن الأسعار القديمة كانت ضرورية لحماية استثمارات الشركات وتحفيزهم على الاستمرار، وضمان انتشار البنية التحتية بشكل أوسع في بناء محطات شحن السيارات.
طيب اية تأثير القرار ده علي اقبال الناس علي شراء السيارات الكهربائية ؟.
كل الخبراء أكدوا أن القرار ممكن يكون لها تأثير سلبي علي اقبال الناس علي شراء السيارات الكهربائية، خصوصا أن تكلفة الشحن بقت بتقارب 50٪ من تكلفة تشغيل سيارات البنزين، ده غير أن في نقص في البنية التحتية اللي بتستخدمها السيارات الكهربائية خصوصا محطات الشحن .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
