يا ترى ايه اللي هيحصل يوم 17 سبتمبر في الفيدرالي الأمريكي؟ وليه العالم كله مستني يشوف ايه اللى هيحصل في اليوم ده؟ وايه تأثيره على الدهب والدولار؟ وعلى الأسواق بشكل عام؟
يوم 17 سبتمبر مش يوم عادي.. ده اليوم اللي هيجتمع فيه أهم ناس في الاقتصاد العالمي.. أو بالأصح.. أهم ناس في البنك المركزي الأمريكي.. أو اللي بيسموه الفيدرالي الأمريكي.
الاجتماع ده ليه أهمية قصوى.. لأنه بيحدد مصير قرارات كتير.. زي سعر الفايدة.. اللي هو أساس كل حاجة في الاقتصاد العالمي. تخيل كده.. إن سعر الفايدة ده.. هو اللي بيحرك عجلة الاستثمار والإنتاج والأسواق المالية.
طب إيه اللي هيحصل بالظبط؟
الفيدرالي الأمريكي هيجتمع.. وهيناقش الوضع الاقتصادي الحالي.. والبيانات اللي طلعت مؤخراً.. زي معدلات التضخم.. وأسعار السلع.. وأسعار الطاقة.. وكمان أداء سوق العمل. وبناء على كل ده.. هيقرروا.. يا إما يرفعوا سعر الفايدة.. يا إما يثبتوه.
ليه الموضوع ده مهم أوي؟
لأن كل قرار بيطلع من الاجتماع ده.. بيأثر بشكل مباشر على جيبك.. وعلى فلوسك.. وعلى مستقبل استثماراتك. لو قرروا يرفعوا سعر الفايدة.. ده معناه إن تكلفة الاقتراض هتزيد.. وده ممكن يقلل من الاستثمار والإنتاج.. ويعمل تباطؤ اقتصادي. لكن في نفس الوقت.. ممكن يساهم في لجم التضخم.. وضبط الأسواق.
وايه تأثيره على الدهب والدولار؟
نبدأ بالدولار..الدولار هو العملة الاحتياطية الأولى في العالم.. وعشان كده أي تغيير في سياسته النقدية.. بيأثر على كل العملات التانية. لو الفيدرالي قرر يرفع سعر الفايدة.. الدولار هيقوى. ليه؟ لأن المستثمرين هيتوجهوا ليه.. عشان هو بيقدم عائد أعلى.. وده بيخلي قيمته تزيد قدام العملات التانية.
أما بالنسبة للدهب.. فهو الملاذ الآمن.. الناس بتلجأ ليه في أوقات الأزمات.. أو لما يكون فيه شك في قيمة العملات الورقية. العلاقة بين الدهب وسعر الفايدة علاقة عكسية. يعني لو الفيدرالي قرر يرفع سعر الفايدة.. ده بيخلي الدهب أقل جاذبية للمستثمرين.. لأنهم بيفضلوا الأصول اللي بتدر عائد زي السندات..
وبالتالي سعر الدهب ممكن ينزل، على الجانب الآخر.. لو الفيدرالي قرر يثبت سعر الفايدة.. أو يخفضه في المستقبل.. الدهب ممكن يرتفع.
المؤكد ان يوم 17 سبتمبر مش مجرد اجتماع.. ده يوم بيكتب تاريخ جديد للأسواق المالية.. وبيحدد مستقبل كتير من الأصول اللي بنستثمر فيها. والقرار اللي هيتاخد فيه.. هيحدد إذا كان الدولار هيزيد.. ولا الدهب هيولع.. وإذا كان الاقتصاد العالمي هينطلق.. ولا هيتباطأ.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
