"وجعت قلبي وقهرتني"..ابنة سامي العدل تنعي سامح عبد العزيز

نعت الفنانة رشا العدل المخرج سامح عبد العزيز بكلمات مؤثرة، وكشفت لـ أول مرة عن مواقف مؤثرة حدثت بينهما، بالإضافة إلى أنهما كانوا سيقومون بمشروع سويًا.

ابنة سامي العدل تنعي سامح عبد العزيز وتكشف مواقف مؤثرة بينهما

وكتبت رشا العدل من خلال حسابها الرسمي عبر موقع التواصل الاجتماعي “فيسبوك” :"وجعت قلبي و قهرتني علي الصبح اكتر ما هو موجوع في ذكرى وفاة بابا مشيت و رحلت عننا ، انا عمرى ما طلعت الكلام ده و لا قلته او وريته لحد بس حقك عليا دلوقتي اقول و ربنا يشهد علي كلامي انك من اجدع الاصدقاء و من اوفاهم".

وأضافت: “انا منزلة موقفين من ضمن مواقف كتير معايا انا شخصيا بس بعضهم شخصي بزيادة ف امتنع عن نشرهم طبعا لما بابا تعب سامح كان رغم شغله و انشغاله في موسم رمضان متابع معايا لحظة بلحظة تليفونات طبعا و رسايل ماسنجر و هو مشغول و طبعا زيارات رغم ان ماكانش بيتسمح بزيارات قوي يعني بس ده مامنعش انه يجرب و ييجي و ماسابنيش طول فترة تعب بابا و بعدها كان بيحرص انه يتطمن عليا من حين ل آخر و يسأل لو محتاجة حاجة او ناقصني شيء”.

وتابعت: “لما فتحت مشروع صغير علي قدى و قررت اعمل اكل و ابيعه كان أول واحد عايز و مصمم يشاركنى و نفتح مطعم في القاهرة و كل شوية يكلمني هاه ياللا بقي و انا اقول له لسة شوية علي الخطوة دي يا موحا و انا نفسيا مش قادرة انزل القاهرة دلوقتي يسكت اسبوع كدة او اتنين و يرجع يكلمني يا بنتي فكري بقي تعبتيني اقوله ما احنا لسة متكلمين يقول لي و لسة برضه بتعندي و يقعد يحاول يقنعني طيب يا رشا انتي بالمجهود و انا راس المال اقول له مش ده اللي معطلني يسيبني شوية و يكلمني تاني يحاول يشجعني علي الخطوة و هكذا”.

واستكملت:" صاحبي صديقي و اخويا الجدع ماكانش حد عارف ان سامح اصلا صديقي من زمان بعيدا عن بابا و العيلة و الوسط الفني و من قبلهم و له مكانة خاصة في قلبي لان بابا كان بيحبه قوي و هو كمان كان بيعشقه،  أديك روحت له يا موحة و سيبتونى هنا لوحدى بس".

وأختتمت: “ انا مش هاسيبكم و هافضل فاكراكم و ادعيلكم و وعد مش هانساك و لا هاقطع دعواتي ليك يا غالي مع السلامة يا صديقي الجدع الطيب الله يرحمك و يغفر لك و يسكنك الفردوس الأعلى من غير حساب ولا سابق عذاب.. وداعًا سامح عبد العزيز ”.