الاقتصاد المصري بيحقق نتائج هايلة في الفترة الأخيرة ونقدر نقول إن كل الارقام الإيجابية في حالة صعود مستمر.. إيه اللي هيحصل في اجتماع البنك المركزي يوم الخميس 28 أغسطس 2025، وهل القرار المنتظر بخصوص أسعار الفايدة هيكون رفع ولا خفض ولا تثبيت، وإيه هي اهم التوقعات؟.
عشان نبقى عارفين الاجتماع الجاي للبنك المركزي هيكون مش عادي، لأنه الاجتماع الخامس خلال السنة دي 2025، والأسواق كلها من بنوك ومستثمرين وشركات وحتى مواطنين عاديين مستنين النتيجة عشان يحددوا خطواتهم الجاية.
والبنك المركزي كان في آخر اجتماع ليه يوم 10 يوليو، قرر يثبت أسعار الفايدة يعني مثل الإيداع عند 24%و الإقراض عند 25% والعملية الرئيسية عند 24.5%، وده بعد ما كان خفضها من بداية السنة بحوالي 3.25%.
لكن مع تحسن مؤشرات الاقتصاد الفترة الأخيرة زي تراجع التضخم واستقرار سعر الصرف وزيادة السياحة وتحويلات المصريين من الخارج، ففي خبراء كتير شايفين إن في فرصة إن البنك يتجه لتخفيض جديد.
واللي بيزود أهمية الاجتماع الجاي إن قدامه 4 اجتماعات كمان قبل نهاية 2025، يعني أي خطوة هتتاخد دلوقتي هترسم ملامح السياسة النقدية لباقي السنة، عشان كده كل الأسواق من البورصة لسوق العقارات وحتى سوق الدهب منتظرين القرار لأنه هيحدد اتجاهات الاستثمار في الشهور اللي جاية.
والمحللين بيأكدوا إن أي قرار من البنك المركزي هيكون ليه تأثير مباشر على البورصة، يعني لو الفايدة انخفصت فالمستثمرين ممكن يحولوا جزء من فلوسهم من البنوك لسوق الأسهم، وده بيدي دفعة قوية للتداولات ويخلي السيولة تزيد بشكل ملحوظ.
مش بس كده .. دا كمان مصر كشفت عن مشروع صانعي ضخم في منطقة السخنة الصناعية، وده بعد عقد شراكة مع شركة صينية اسمها "جيانجسو زيونج.. إيه الحكاية.. تعالوا نشوف"
نقدر نقول، إن المشروع ده هيكون على مساحة 181 ألف متر مربع وبتكلفة استثمارية 85 مليون دولار يعني تقريباا 4.1 مليار جنيه مصري، واللي مميز بقى إن المصنع هيشتغل على إنتاج الأرضيات وألواح الجدران من مواد اسمها ال PVC وإعادة التدوير، وحجم الإنتاج السنوي المتوقع يوصل ل 27 مليون متر مربع.
والأهم بقى هنا، إن 90% من الإنتاج ده رايح للتصدير للأسواق العالمية و10% بس هيتباع محلي، وكمان المشروع هيوفر حوالى 500 فرصة عمل مباشرة، والموضوع مش بس أرقام لأ ده بيعكس قد إيه المنطقة الاقتصادية لقناة السويس بقت وجهة للمستثمرين الكبار.
كمان، اختيار الشركة الصينية للسخنة مش جاي صدفة، لكن بفضل الموقع الاستراتيجي والبنية التحتية اللى مصر جهزتها عشان تستقطب استثمارات تقيلة زي دي.
ومن ناحية تانية، المشروع ده بيدعم هدف مهم جدا وهو توطين الصناعات وتعميق التصنيع المحلي، يعني مش بس هنصدر لكن كمان هننقل تكنولوجيا جديدة ونزود القيمة المضافة لمنتجاتنا، وده معناه فرص تصديرية أقوى لمصر في سوق عالمي فيه طلب متزايد على المنتجات دي.
واللي يهمنا كمصريين، إن وجود مصانع جديدة بالشكل ده معناه فرص عمل للشباب وضخ عملة صعبة في البلد من التصدير، وبالتالي دعم استقرار الجنيه قدام الدولار، غير إن الصناعات دي هتساعد في ربط مصر أكتر بسلاسل الإمداد العالمية.
ونيجي بقى للاقتصاد المصري، اللي حاليا هو في أفضل مراحله ومحقق مكاسب كبيرة جدا.. ياتري إيه سر المكاسب الكبيرة اللي حققها الجنيه المصري.. وأمتي الجنيه هيكون ند قوي للدولار الامريكي.
خلال الشهور اللي فاتت شوفنا سعر صرف الجنية المصري بدأ يكون احسن بكتير من الفترات اللي فاتت وحاليا سعر صرف الجنية المصري بيتحسن وسعر صرف الدولار بينخفض وده بيدل على نجاح البرنامج الاقتصادي المصري.
التحسن اللي حصل في سعر صرف الجنية المصري له اكثر من سبيه ارتفاع الاحتياطي الأجنبي لمستويات قياسية ودخوله على الـ50 مليار دولار.. وزيادة تدفقات السياحة واللي هي كمان بتحقق ارقام غير مسبوقة والتحويلات المالية ده غير التوصيات الإيجابية المتوقعة من صندوق النقد الدولي عن الاقتصاد المصري في المستقبل، واللي أكد أن النمو الاقتصادي هيوصل ل 4.6% خلال العام المالي .
طيب ايه اللي بتعمله الحكومة علشان تضمن تحسن سعر صرف الجنيه المصري قدام الدولار ؟.
في عدد كبير من الخطوات الحكومة بتقوم بيها حاليا لتحقيق استقرار وتحسن سعر صرف الجنية المصري أهمهم زيادة الثقة عند المستثمرين في الاقتصاد المصري وزيادة التدفقات الخارجية للعملات الاجنبيه بالبنوك وزيادة إيرادات القطاعات اللي بتدخل عملات أجنبية زي السياحة وقناة السويس وتحويلات المصريين العاملين بالخارج وقطاع الصناعة، ده غير جهود تشديد الرقابة على السوق السوداء وتوجيه التدفقات للقنوات الرسمية في البنوك.
خطوة كمان من الخطوات اللي بتقوم بيها الحكومة حاليا لتحسن سعر صرف الجنيه المصري هيا السياسة النقدية الحكيمة اللي بيطبقها البنك المركزي حاليا واللي بتستهدف التقليص التدريجي لأسعار الفائدة بعد خفض معدلات التضخم واستمرار سعر صرف مرن وفقا لشروط صندوق النقد الدولي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
