يا ترى امته البنك المركزي المصري هيعمل اجتماعه الجاي بخصوص الفايدة وهيقرر إيه، هيخفض الفايدة تاني ولا هيفضل على التثبيت ولا ممكن نشوف قرار مفاجئ؟
في الحقيقة، اجتماع البنك المركزي بخصوص الفايدة قرب جدا وهيكون خلال أيام، والقرار المنتظر ده
مهم جدا لأنه خامس اجتماع للجنة السياسات النقدية السنة دي من أصل 8 اجتماعات دورية، وبيأثر بشكل مباشر على البنوك والمستثمرين، وكمان على جيب المواطن العادي.
وفي الاجتماع اللي فات يوم 10 يونيو، البنك المركزي قرر يثبت الفائدة عند 24% للإيداع و25% للإقراض و24.5% للعملية الرئيسية، لكن قبلها في اجتماعين متتالين، المركزي كان خفض الفايدة بإجمالي 3.25%، يعني 325 نقطة أساس مرة واحدة.
وهنا، الخبرا شايفين إن المرة دي قدام المركزي احتمالين، يا إما يثبت الفايدة للمرة التانية على التوالي، يا إما يخفضها بنسبة بسيطة زي مثلا من 0.25% ل 0.5%، وده بيعتمد على مؤشرات التضخم وحركة الأسعار في السوق.
كمان، خفض الفايدة ده معناه إن تكلفة الاقتراض هتبقى أقل، وده ممكن يشجع الاستثمار ويحرك السوق العقاري والصناعي، لكن من الناحية التانية فالتثبيت ممكن يكون أضمن لو التضخم لسه مش تحت السيطرة بشكل كامل.
المواطن بقى يهمه إيه من القصة دي؟
بص يا سيدي، القرار طبعا هيأثر على أسعار الشهادات البنكية والقروض وكمان التمويل العقاري حتى حركة الأسعار في السوق، يعني باختصار أي تغيير في الفايدة بيمس كل بيت في مصر بشكل مباشر أو غير مباشر.
واللي يخلي الاجتماع ده مختلف كمان إنه الأول للمحافظ بعد تجديد الثقة فيه، وده بيخلى الأنظار كلها متسلطة على توجهاته للمرحلة اللي جاية.
وفي نقطة تانية مهمة، وهي ان أي قرار للبنك المركزي بخصوص الفايدة هيأثر بردو على قوة الجنيه قدام العملات التانية، يعني لو حصل خفض للفايدة فده ممكن يضغط شوية على الجنيه قدام الدولار والعكس صحيح، بس التثبيت ممكن يدي نوع من الاستقرار للعملة المحلية في الفترة الجاية.
ومن الناحية التانية، أسواق المال والبورصة كمان مستنية القرار بفارغ الصبر لأن خفض الفايدة ممكن يفتح شهية المستثمرين يضخوا سيولة أكتر في الأسهم والسندات لكن التثبيت ممكن يخليهم يصبروا شوية في قراراتهم.
يعني الخلاصة، السوق كله فى حالة ترقب من المستثمر الكبير لحد المواطن اللي بيتابع أسعار الفايدة عشان يعرف مصير شهاداته أو قرضه، يعني يوم 28 أغسطس هيكون تاريخي لأنه هيأثر على حياتنا كلنا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
