"أبوالليف" يكشف لـ"مصر تايمز" أصعب المواقف في ...

"مبقاش عندي ثقة في حد من اللي أنا شوفته فحياتي.. أنا خدت الضربة بجد من أقرب ناس"، كلمات مؤثرة لا يمكن أن ينساها جيل بأكمله، صاحبها الفنان نادر نبيل، الشهير بـ أبو الليف، الذي لمع اسمه في الساحة الغنائية بعد ألبومه الشهير "كينج كونج" عام 2010، رغم أن بدايته الفنية تعود إلى التسعينيات وصعوده الحقيقي كان في الألفينات.

 

لم تكن رحلة أبو الليف سهلة، بل اتسمت بالقسوة؛ فالحياة لم تمنحه دعمًا كافيًا، بل واجه خذلانًا حتى من أقرب المقربين، وصولًا إلى أن زوجته استولت على أمواله وهربت. ومع ذلك، صقلت هذه التجارب شخصيته ورسخت اسمه كأحد أبرز الأصوات المختلفة على الساحة.

 

واختص الفنان “أبو الليف” "مصر تايمز" بحوار خاص، ليفتح قلبه عن الحديث بشأن مسيرته، ومعاناته، وعلاقته بالجمهور وربه، حيث كشف عن تعرضه لعدد من المواقف الصعبة في مشواره الفني، أبرزها سرقة بعض أغانيه وألحانه على يد مطربين كبار.

 

وقال أبو الليف: "أنا اتسرق مني أغانٍ كتير، مش أغنية واحدة بس. مش رضا البحراوي وبس، لا.. جورج وسوف كمان خد اسم ألبومه من أغنيتي (سلف ودين). الأغنية دي أنا كنت عاملها سنة 1992، لكن ما طلعتش غير متأخر، وفجأة لقيت نفس الاسم متاخد."

 

وأضاف: "كمان حكيم سرق مني لحن أغنية، وأنا اتظلمت كتير في حياتي الفنية. عمري ما كنت بدوّر على شهرة بس كنت عايز الناس تسمع صوتي وفني بجد، مؤكدًا أن هذه المواقف كانت سببًا في شعوره بالظلم الفني، مشيرًا إلى أن هناك من تعمد عرقلة مشواره رغم موهبته، لكنه مازال متمسكًا بالغناء وتقديم الجديد لجمهوره، وإلى نص الحوار.

إيقاع الحياة

في البداية، كيف ترى إيقاع الحياة الآن؟

الحياة في الأول كانت ماشية برتم طبيعي وبطيء شوية، دلوقتي اليوم والشهر والسنة بيطيروا من غير ما نحس.

 

الخلافات العائلية

هل هناك خلافات أو مشاكل شخصية؟

مفيش خلافات، بس فيه مواقف. أنا شخصيًا مش بحب أتكلم في الحاجات دي عشان مش حلوة، وبتخص أهلي، وده عيب.

 

حدثنا عن مشكلة ميراثك في الإسكندرية؟

أنا عندي شقة ورث في جليم – إسكندرية، أخويا حط إيده عليها وفيه قضايا دلوقتي.

 

الحظ والرضا

هل تعتبر أن "حظك وحش"؟

أنا حظي وحش فعلاً، بس الحمد لله راضي. اللي ييجي في الفلوس في داهية، المهم إني واقف على رجلي وربنا ساترني.

 

ماذا عن قصتك مع زوجتك؟
اللي تمامه جنيه ياخده. اللي بياخد بياخد قيمته، وأنا مش فارق معايا.

 

الفن والمهرجانات

هل ترى نفسك مظلوم فنيًا؟

آه، أنا مهضوم حقي فنيًا. بحس إن في حد ورايا بيوقف أي حاجة أخش فيها، بس مش عارف مين.

 

ممكن توضح بمثال؟

كان عندي حفلة في الساحل. اتفقنا على الأجر وخدت عربون، وجه يوم الحفلة قالي "معلش الحفلة اتلغت عشان الأمن". عرضت أجيب التصريح الأمني، رفض وقال خلاص مش عايز. الموضوع خلاني أتأكد إن في حد بيوقفني فعلًا.

 

هل تشك أن هذا خاص بحفلات الساحل كلها؟

لأ، أنا عملت حفلات كتير السنة دي في الساحل والحمد لله. أنا بتكلم عن موقف معين خلاني أتأكد إن في حاجة مش طبيعية.

 

هل تحلم بالمشاركة في مهرجانات كبرى مثل مهرجان العلمين؟

طبعًا نفسي جدًا، ده شيء جميل جدًا.

 

النجومية والبدايات

لو بدأت من جديد.. هل تختار نفس الطريق؟

أكيد. سكتي من أول ما طلعت لحد النهاية هي دي.

 

كيف تتعامل مع فكرة النجومية؟

أنا ربيت على ثوابت أبويا، ما عنديش تكبر ولا غرور. على المسرح أنا بطل، لكن بعد الحفلة أنا إنسان عادي زي أي حد. اللي يحب يتصور معايا يتفضل، مش بخسر حاجة.

 

ماذا كنت ستعمل لو لم تكن مطربًا؟

اشتغلت حاجات كتير: عامل بناء، بايع لعب أطفال، صبي كهرباء، سواق تاكسي في إسكندرية، واشتغلت على البحر أجر شماسي وكراسي.

 

أول مرة وقفت على المسرح.. كيف كانت؟

كانت من زمان جدًا في مشهد من "عصفور من الشرق" مع نور الشريف وسعاد حسني. كنت متوتر جدًا وسط عمالقة. اللي جابني وقتها الدكتور جمال سلامة الله يرحمه.

 

الحياة اليومية

ما هي الأكلات المفضلة لديك؟

أنا مش بحب اللحمة ولا الفراخ، بحب السي فود والسمك.

 

هل تربيت في الإسكندرية؟

أنا اتربيت في القاهرة، لكن كنت كل صيف أنزل إسكندرية. أصلي من سوهاج – العصيرات.

 

ما أصعب موقف واجهته في الشارع؟

مواقف كتير خلتني أقول "أنا بأي تريند على السوشيال ميديا". الدنيا بقت مليانة غدر ومنافسة.

أغنية "مبقاش عندى ثقة فى حد" كل مرة بتغنيها الجمهور بيحس إنك متأثر جدًا.. ليه؟
لأنها مرتبطة بالظلم اللي اتعرضت له والتجريح والغدر. كل مرة بغنيها بحس كإني بشوف فيلم قدامي.

 

هل ترى أن الكوميديا الغنائية ممكن تعود من جديد؟

طبعًا، لو لها هدف. زي ما عمل سيد الملاح أو عمر الجزاوي.

 

الإيمان بالله

كلمنا عن ربنا فى حياتك؟
الحمد لله ربنا ما سبنيش لحظة واحدة، أنا على طول ربنا معايا.

 

امتى حسيت إن ربنا في بيتك؟

أما حصل عندي حريقة. ساعتها أنا وولادي الثلاثة كانوا لسه أطفال معدوش الـ10 سنين. الشقة كلها اتفحمت، خدت عيالي في حضني وخرجت من وسط الحريق بظهري، وماهمنيش غير إنهم يبقوا كويسين.
أبو الليف يكشف: "اتسرقت مني أغاني واتعبت كتير عشان صوتي يوصل"

حوار المطرب أبو الليف مع مصر تايمز