آلاف من فرص العمل الجديدة أعلنت عنها وزارة العمل..، هل فعلا الشركات هتلتزم فعلا بالحد الأدنى للأجور ولا هنسمع شكاوى بعدين؟.. وإزاي الوزارة هتابع وتضمن إن كل شركة وفرت التأمين الصحي والاجتماعي للموظفين الجداد؟.. وهل الوظايف المتاحة دي هتكون فرصة حقيقية للخريجين الجداد ولا محتاجة خبرة سنين قبلها؟.
خبر مهم جدًا وبيهم ناس كتير، وده بعد ما وزارة العمل لسه معلنة عن 4374 فرصة عمل جديدة في شركات القطاع الخاص، والفرص دي متوزعة على 48 شركة في 12 محافظة، يعني لو إنت من القاهرة، الجيزة، إسكندرية، المنيا، القليوبية، المنوفية، أسيوط، الإسماعيلية، السويس، الشرقية، الوادي الجديد أو بورسعيد، يبقى ليك نصيب كبير جدًا إنك تلاقي فرصة تشتغل.
الوظايف المتاحة متنوعة جدًا ومش محصورة في تخصص واحد، لأ دي بتغطي مجالات مختلفة زي: أخصائي تسويق، موارد بشرية، مهندسين اتصالات وكهرباء وميكانيكا، محاسبين، مشرفين إنتاج وجودة، مراقبين، شيفات، أفراد أمن، سواقين بكل الرخص، وحتى عمال إنتاج ونظافة ومجالات المطاعم والفنادق، يعني أيًا كان مجالك أو خبرتك فيه احتمال كبير تلاقي وظيفة مناسبة.
الوزارة كمان مأكدة إن الرواتب "مجزية" وبتتحدد بعد المقابلة، لكن على الأقل بيتم الالتزام بالحد الأدنى للأجور، غير إن فيه تأمين صحي واجتماعي، وده في حد ذاته بيدي أمان للشباب اللي عايز يشتغل ويأمن مستقبله.
الميزة الكبيرة كمان إن النشرة دي مش ناسية أصحاب الهمم، الوزارة وفرت مجموعة من الوظائف المخصصة ليهم، علشان الشركات تلتزم بنسبة الـ5% اللي لازم يتم تشغيلها من ذوي القدرات الخاصة، وده تنفيذًا للقانون رقم 10 لسنة 2018، وده كمان بييجي في إطار توجيهات الرئيس عبد الفتاح السيسي بدمج ذوي الهمم في سوق العمل.
طيب إزاي تقدم؟، التقديم متاح خلال أغسطس وسبتمبر 2025، وده من خلال الإدارة العامة للتشغيل في مقر وزارة العمل القديم بمدينة نصر، أو من خلال مديريات العمل في المحافظات، وكمان أونلاين على الموقع الرسمي لوزارة العمل.
وزير العمل محمد جبران بنفسه أكد أن الدولة بتعمل كل اللي تقدر عليه علشان الشباب يلاقي فرصة مناسبة في القطاع الخاص، وأكد كمان على برامج التدريب المهني المجانية اللي بتأهل الشباب لسوق العمل، وده مهم جدًا علشان اللي معندوش خبرة يقدر يتعلم ويلاقي فرصة يثبت فيها نفسه.
الوزير كمان شدد على إن كل مديريات العمل لازم تتابع بعد إعلان الوظايف وتتأكد أن الشباب فعلا استلم الفرص المناسبة، وكمان يضمنوا إن كل الشركات ملتزمة بالحد الأدنى للأجور.
يعني باختصار، قدامك فرصة دلوقتي، سواء إنت شاب خريج جديد، أو حد بيدور على شغل أفضل، أو حتى من أصحاب الهمم، مفيش حجة، الفرص متاحة والوزارة بتقولك اتفضل، اللي عايز يشتغل يقدر يبدأ من دلوقتي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
