إيه اللي بيميز محطة سفاجا 2 عن باقي المواني؟، ليه المشروع واخد كل الاهتمام في الوقت ده؟.. إيه أهمية إن الرصيف يوصل طوله لـ 1100 متر وعمقه لـ 17 متر؟، وهل الأرقام اللي بنسمعها زي 2 مليون حاوية و7 مليون طن بضايع هتفرق فعلًا في مكانة مصر تجاريًا؟.. ومين أكتر مستفيد من المشروع ده؟.. وإزاي محطة سفاجا 2 هتخدم إقليم الصعيد؟..
تخيل معايا إنك واقف في ميناء سفاجا، والسفن رايحة جاية، وفجأة تلاقي قدامك مشروع ضخم بيترسم على أرض الواقع: محطة سفاجا 2 متعددة الأغراض.
الموضوع مش مجرد محطة عادية، لأ، ده مشروع استراتيجي معمول عشان يخلي مصر تبقى مركز عالمي للنقل واللوجيستيات وتجارة الترانزيت.
المحطة دي بتتعمل على مساحة مهولة، حوالي 776 ألف متر مربع! يعني مساحة تكفي إنها تبقى مدينة صغيرة جوه الميناء، وكمان فيها رصيف طوله 1100 متر، وعمقه يوصل لـ 17 متر، عشان يقدر يستقبل أكبر السفن وأثقل الحمولات.
اللي يفرح بقى إن شركات مصرية وطنية خلصت البنية التحتية بنسبة 100%، وبدأوا دلوقتي يشتغلوا على البنية الفوقية، يعني المشروع ماشي بسرعة، ومفيش هزار.. المحطة دي مش بس رصيف وساحة، دي قادرة تستوعب 2 مليون حاوية في السنة، وكمان تستقبل حوالي 7 مليون طن بضائع عامة، الرقم ده لوحده يخلي ميناء سفاجا يبقى نقطة محورية في التجارة البحرية، مش في مصر بس، لكن في المنطقة كلها.
والحكاية مش وقفت هنا، لأ، ده المشروع جزء من خطة أكبر اسمها الممر اللوجستي المتكامل "سفاجا – قنا – أبو طرطور"، وده واحد من أهم الممرات الدولية اللي مصر بتجهزها عشان تعزز وجودها في التجارة العالمية.
يعني باختصار، محطة سفاجا 2 هتبقى البوابة الرئيسية لتنمية إقليم الصعيد كله، هتخدم النشاط التعديني في المثلث الذهبي، وتفتح أبواب التصدير والاستيراد، وكمان تجذب استثمارات جديدة في الصناعة، التخزين، والخدمات اللوجستية.
الحاجة العبقرية كمان إنهم مخططين يعملوا ربط للمحطة دي مع شبكة السكك الحديدية، وخصوصًا الخط الثالث للقطار الكهربائي السريع، وده معناه إن البضايع هتتنقل من جنوب الوادي لحد الميناء من غير ما تضغط على الطرق، يعني أقل زحمة على طرق زي قنا وأسيوط والأقصر وأسوان وأقل تكلفة ووقت في النقل.
الوزارة كمان عملت عقد مع شركات عالمية متخصصة عشان يتولوا البنية الفوقية، اللي هما التشغيل والصيانة، وبعد فترة يسلموا المحطة للدولة تاني، وده معناه إنك ضامن أعلى كفاءة تشغيلية، وأحدث تكنولوجيا موجودة في العالم.
باختصار، سفاجا 2 مش بس محطة، دي نقلة نوعية لمصر كلها، مشروع هيغير شكل التجارة في البحر الأحمر، ويخلي مصر لاعب أساسي في حركة النقل العالمية، وده كله هينعكس على الاقتصاد القومي بشكل ضخم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
