تحدث الإعلامي محمود سعد عن مشاركته بالتمثيل في فيلم درويش ومسلسل كامل العدد، مشيرا إلى أنه يقوم بهذا الأمر كنوع من التسلية وليس كشخص موهوب، وبدأ في روي تفاصيل التعاون في تلك الأعمال.
محمود سعد يكشف عن تفاصيل مشاركته في مسلسل كامل العدد
وقال محمود سعد في تصريح رصدها موقع تحيا مصر كان الأستاذ خالد الحلفاوي ابن صديقي العزيز الغالي نبيل الحلفاوي كلمني وقالي أنا عايزك في دور في مسلسل كامل العدد، قولت له يا خالد أنا ماليش في الحاجات دي، وأنا مبعرفش أمثل، قالي أنا جايبلك 5 حلقات إقراهم، رحت بعت له رسالة قلت له مش هقدر والدور بتاعي عمله أحمد كمال وهو ممثل ممتاز، وحصل اللي حصل لنبيل وغادر كده في ظرف غامض زي الريح.
وتابع محمود سعد حديثه: بعدها كلمني وليد عشان أشارك في فيلم، وقالي بابا كان هيكلمك وقالي أنا هجيبلك محمود يعمل الدور، لأن إنت اللي في السيناريو، محمود في البرنامج بتاع البيت بيتك سنة 2005، وبعدها في نص رمضان لقيتهم بيكلموني، وقالولي احنا عايزين البدلة اللي طلعت بيها سنة 2005، وعايزين شعرك زي سنة 2005، وبعدها طلبوا يصبغوا شعري عشان يرجعوني 20 سنة لورا.
محمود سعد عن فيلم درويش: كنت رايح ضيف شرف
وأضاف عن مشاركته في فيلم درويش: وبعدين قابلت يسرا ومكنتش حتى أعرف اسم الفيلم إيه، وبعدها شفت عمرو يوسف عرفت إنه بطل الفيلم وأنا مكنتش عارف حاجة، وكنت رايح ضيف شرف، والصراحة كان وليد مش معقول في الالتزام.
واختتم محمود سعد: أنا بعمل كده تسالي ومعنديش موهبة، وما بعرفش أقول وكلام غيري، الكلام اللي كتبوه ليا، قلت لوليد الحلفاوي إني مش هعرف أقوله، قلت له فريد شوقي كان يقرا الكلام ويقول معناه، وأنا هعمل كده.
محمود سعد يقدم باب الخلق على قناة النهار
ويستعد محمود سعد لتقديم برنامجه باب الخلق على شاشة قنوات النهار، حيث يعرض البرنامج بدءًا من الأسبوع الأول من سبتمبر المقبل على الشاشتين معًا في موعده يومي الخميس والجمعة أسبوعيًا.
