"وادي التكنولوجيا".. مشروع جديد هيعمل قلبان في المنطقة الاقتصادية بقناة السويس

يا ترى إيه حكاية "وادي التكنولوجيا" اللي فجأة بقت حديث ناس كتير، وليه هيعمل قلبان في المنطقة الاقتصادية بقناة السويس، هل ممكن فعلا يعير شكل المنطقة الصناعية في قلب سيناء؟

في الأيام الأخيرة، رئيس الهيئة العامة للمنطقة الاقتصادية لقناة السويس وليد جمال الدين، شهد وضع حجر الأساس لأول مشروعين هنود في منطقة "وادي التكنولوجيا" بالإسماعيلية شرق، واللي هيكونوا بداية استثمارات ضخمة هناك.

والمشاريع دى قيمتها في المرحلة الأولى 40 مليون دولار، فالمشروع الأول اسمه Ferro Genesis، وده مصنع هيشتغل على إنتاج عناصر أساسية لصناعة الصلب زي السيليكون منجنيز والفيرو سيليكون، والمرحلة الأولى لوحدها استثمارها 15 مليون دولار، على مساحة 35 ألف متر مربع، وهيوفر 150 فرصة عمل مباشرة.

أما المشروع التاني، فهو Willow Ferro، وده مصنع للصناعات المعدنية، واستثماراته في المرحلة الأولى 25 مليون دولار ومساحته 40 ألف متر مربع، وهيفتخ 120 فرصة عمل، والمصنع ده هيبدأ بإنتاج الفيرو سيليكون والفيرو كروم وطاقة إنتاجه هتوصل ل 36 ألف طن سنوي.

وليد جمال الدين، قال إن المشاريع دي مش مجرد مصانع لأ دي بداية حقيقية لتنمية صناعية في "وادي التكنولوجيا"، واللي تعتبر ظهير صناعي لمدينة الإسماعيلية الجديدة، وأكد كمان إن الهيئة اشتغلت 3 سنين متواصلة عشان توصل للحظة دي، والهدف مش بس استثمارات لكن كمان فرص عمل لأبناء سيناء وتوطين صناعات استراتيجية.

ونقدر نقول، ان المنطقة دي هتستفيد من شبكة نقل قوية زي كوبري الفردان الجديد وأنفاق 3 يوليو وكملن محطات سكك حديد مطورة دت غير بنية تحتية جاهزة، فكل ده هيخلي "وادي التكنولوجيا" حلقة وصل بين مناطق الإنتاج والأسواق.

وفي مفاجأة كمان، وهي ان رئيس الهيئة أعلن إن في سبتمبر الجاي هيكون فيه افتتاحات كبيرة في منطقة "القنطرة غرب" الصناعية، واللي هتبقى قاعدة عالمية لصناعة المنسوجات والملابس الجاهزة.

والخلاصة، هى ان "وادي التكنولوجيا" مش مجرد اسم على الخريطة دي بداية فصل جديد في قصة التنمية الصناعية في قناة السويس، ومع استثمارات بالملايين وبنية تحتية جاهزة وموقع استراتيجي فالمنطقة دي ممكن تتحول لواحد من أهم المراكز الصناعية في الشرق الأوسط في السنين الجاية.