منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن عودة مصر على خريطة إنتاج الغاز الطبيعي بسبب "بلسم – 3".
قال التقرير، إن القصة بدأت مع بئر "بلسم-3" تبع شركة الوسطاني للبترول، البئر ده كان بينتج من طبقة اسمها "قواسم"، لكن الطبقة دي نضبت والإنتاج وقف، وكان القرار الأقرب إنه يتقفل ويتردم.. لكن فريق العمل ما استسلمش، قالك: "طب ما نجرب نشوف طبقة تانية"، لكن المشكلة أن المعلومات قليلة، ومافيش تسجيلات كهربائية لطبقة كفر الشيخ في البئر ده.. رغم كده، بدأوا يدرسوا الطبقة دي باهتمام، حللوا نسب الغاز اللي طلعت أثناء الحفر، استخدموا تحليل زلزالي متطور ومعايرة (AVO)، وفي الآخر حددوا منطقة واعدة جوه تكوين كفر الشيخ السطحي من عصر البليوسين.
وأكد التقرير، أن البئر اللي كان خلاص على وش الهجر، بقى بينتج حوالي 5 مليون قدم مكعب قياسي من الغاز يوميًا، وزود احتياطي الشركة بـ4 مليار قدم مكعب غاز طبيعي.. الإنجاز ده مش بس وفر فلوس، لكنه كمان فتح باب أمل إن فيه آبار تانية ممكن نستغلها بنفس الطريقة.. والمفاجأة بقى إن ده مش النجاح الوحيد للشركة الشهر ده، قبلها بأيام، فريق الوسطاني حفر البئر (بيجونيا-2)، اللي بيطلع حوالي 7 مليون قدم مكعب غاز يوميًا وكمان 200 برميل متكثفات.
وأوضح تقرير بانكير، أن وزارة البترول وإيجاس وشركة دانا غاز كانوا داعمين بقوة، وده اللي خلى المشروع يطلع للنور، ويقدم نموذج ناجح لإنتاج أكتر، بتكلفة أقل، وبأسرع وقت.
منصات بانكير قدمت تقرير مختلف النهاردة عن خطوات حجز وحدة سكنية ببرنامج سكن لكل المصريين 7
أكد التقرير، أن الاقبال الكبير من المواطنين على طرح سكن لكل المصريين 5 فتح نفس الحكومة علشان تكرر طرح وحدات سكنيه جديدة للمواطنين وللمرة التانية صدر توجيه رئاسي للحكومة بتجهيز طرح جديد لشقق الاسكان الاجتماعي والمرة دي الحكومة طرحت أكثر من 113 الف وحدة سكنية ضمن برنامج سكن لكل المصريين 7 وده الأولوية فيه بتكون للمواطنين اللي قدموا في برنامج سكن لكل المصريين 5 واللي هما كانوا خارج الأولوية او مش منطبق عليهم الشروط وكانوا مستبعدين من القرعة بسبب وجود عدادات كهرباء أو عدادات غاز طبيعي، بشرط أنهم يقننوا أوضاعهم وكمان يكونوا في المرحلة السنية ما بين 21 الي 50 سنة وكمان يكون في الشريحة المستهدفة من الدخل من 3500 الي 15 الف جنيها للأسرة ومن 3500 الي 12 الف جنية للفرد الاعزب.
وأوضح التقرير، أن الحكومة حددت أنواع مختلفة من الشروط أولهم للناس اللي كانت مقدمة في برنامج سكن لكل المصريين 5 ودول هيكون مطلوب منهم طباعة استمارة الحجز من كراسة الشروط اللي هينزلها من علي بوابة مصر الرقمية ويرفق معاها إيصال السداد اللي بقيمة 50 الف جنية قيمة جدية الحجز، وهيرفعهم في ملف مش هيتعدي مساحته 2 ميجابات علي موقع بوابة مصر الرقمية.
وأضاف التقرير، أن الناس اللي هتقدم اول مرة فدول هيكون مطلوب منه ملف كامل للتقديم وده عبارة عن قيد عائلي عائلي وشهادات ميلاد لأبناء وبطاقة سارية للمواطن وزوجته ومفردات مرتب وعقد ايجار ووصل مرافق ووصل سداد مقدم جدية الحجز واللي بقيمة 50 الف جنية وهيرفع برضو في ملف علي بوابة مصر الرقمية.
وحدة أبحاث بانكير قدمت تقرير خاص النهاردة عن أسرار افتتاح المتحف المصري الكبير في بداية نوفمبر.
أكد تقرير بانكير، أنه بعد فترات طويلة من التأجيلات خلاص الحكومة حددت وبشكل نهائي ميعاد افتتاح المتحف المصري الكبير واللي بيعتبر أكبر متحف للآثار في منطقة الشرق الأوسط وأفريقيا واللي هيعرض أكثر من 53 الف قطعة أثرية أغلبهم هيعرض لاول مرة في التاريخ من وقت اكتشافهم خصوصا المجموعة الأثرية للملك الذهبي توت عنخ آمون.
وأوضح التقرير، أن الحكومة حاطة امل كبير جدا علي المتحف المصري الكبير أنه يحقق طفرة في أعداد السائحين الوافدين لمصر خصوصا بعد الزيادة الكبيرة، وده بعد ما الحكومة أعلنت وبشكل رسمي عن اختيار يوم 1 نوفمبر كمعياد نهائي لافتتاح المتحف المصري الكبير وده بعد موافقة الرئيس عبدالفتاح السيسي علي اختيار اليوم المحدد للافتتاح واللي هيتم فيه توجيه الدعوة لعدد كبير من قادة وملوك ورؤساء دول اغلب دول العالم للحضور الي مصر وحضور حفل الافتتاح.
وأشار تقرير بانكير إلى أن الحكومة اختارت الاول من نوفمبر المقبل كمعياد لحفل افتتاح المتحف المصري الكبير خصوصا أنه هيكون بداية الموسم السياحي الشتوي واللي مصر بتشهد فيه اقبال كبير جدا من السائحين والوافدين من اغلب دول العالم علي مصر لقضاء الإجازات بسبب ارتفاع درجة البرودة في دول أوروبا، والحكومة بتستهدف تحقيق 5 مليون سائح زيادة في الأرقام المستهدفة بالاستراتيجية الوطنية للسياحة مع افتتاح المتحف.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
