يا ترى إيه اللي حصل في سوق الدهب وخلاه ينزل بعد ما كان بيولع الأيام اللي فاتت.. وهل النزول ده فرصة للشراء ولا بداية لموجة هبوط أكبر؟
في الساعات الاخيرة، سعر جرام الدهب عيار 21 اللي هو الأشهر في مصر، سجل 4610 جنيه للشراء و4585 جنيه للبيع، يعني نزل حوالى 10 جنيه بعد ما كان طالع حوالى 40 جنيه في يومين بس، وسعر عيار 24 وصل ل5268 جنيه للشراء، وعيار 18 بقى حواى 3951 جنيه، والجنيه الدهب هز كمان سجل 36.88 ألف جنيه.
طب إيه السبب في الهبوط ده رغم إن الناس كانت متوقعة يكمل طلوع؟
بص يا سيدي، أول حاجة هي أسعار الأوقية عالميا االي حصل فيها هدوء نسبي ووصلت حوالى 3394 دولار وده بعد موجة صعود بسبب مخاوف الركود العالمي.
وتاني حاجة هي السوق المحلي اللى اتأثر بحركة البيع الكبيرة من بعض التجار والمستثمرين اللي حابوا يستفيدوا من الارتفاع الأخير ويجنوا أرباحهم، وكمان حركة الشراء من الناس الهادية بقت أهدى شوية بعد ما الأسعار وصلت أرقام قياسية الأيام اللي فاتت.
طيب، والتوقعات الجاية إيه؟
محللين في بنك NAB شايفين إن الدهب على المدى الطويل ممكن يكمل صعوده لحد ما يوصل متوسط 3220 دولار للأوقية في نهايو السنة دي 2025، ويوصل ل 3475 دولار في 2026 خاصة مع تباطؤ الاقتصاد العالمي واتجاه البنوك المركزية للتيسير النقدي.
لكن على المدى القصير، الأسعار ممكن تفضل تتحرك طالع نازل حسب حركة الدولار وأسعار الفايدة وأي أحداث سياسية أو اقتصادية كبيرة، وده يأكد إن حركة السوق المصري ساعات بتكون مرتبطة أكتر بعرض وطلب الداخل، مش بس بالسوق العالمي.
ولو إنت من المستثمرين الصغيرين اللي بيشتروا جرامات أو جنيهات دهب، فمهم جدا تعرف إن الاستثمار في الدهب محتاج صبر وإن الشرا في وقت الهبوط غالبا بيكون أفضل لكن لازم تبقى عارف إن الأسعار ممكن تنزل أكتر قبل ما تطلع، فخليك دايما عامل حسابك وما تحطش كل فلوسك في مرة واحدة.
والخلاصة، هي انك لو بتفكر تشتري دهب فلازم تتابع حركة الأسعار يوم بيوم وتشوف السوق العالمي عامل إزاي قبل ما تاخد قرارك، وماتنساش ان المعدن الاصفر دايمل ملاذ آمن بس توقيت الشراء هو اللي بيحدد مكسبك أو خسارتك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
